September 23, 2021

കോഴിക്കോട് ഹെസ്സ ജ്വല്ലറിയില്‍ സൂക്ഷിച്ച മുഴുവന്‍ സ്വര്‍ണ്ണവും അനധികൃതമാണെന്ന് കസ്റ്റംസ്

കോഴിക്കോട്: കോഴിക്കോട് അരക്കിണറിലുള്ള ഹെസ ഗോള്‍ഡ് ആന്‍ഡ് ഡയമണ്ട് ജ്വല്ലറിയില്‍ ഇന്ന് രാവിലെ മുതല്‍ കസ്റ്റംസ് വകുപ്പ് റെയ്ഡ് തുടരുന്നു.ജ്വല്ലറിയില്‍ സൂക്ഷിച്ച മുഴുവന്‍ സ്വര്‍ണവും അനധികൃതമാണെന്ന് കസ്റ്റംസ് അറിയിച്ചു. ജ്വല്ലറിയുടമ ഷമീം, വട്ടക്കിണര്‍ സ്വദേശി ജിപ്‌സണ്‍ എന്നിവരെ കസ്റ്റഡിയിലെടുത്തു. സ്വര്‍ണക്കടത്തിനായി ഇരുവരും പണം നിക്ഷേപിച്ചിട്ടുണ്ടെന്ന് കസ്റ്റംസ് പറഞ്ഞു.

രാവിലെ പതിനൊന്ന് മണിയോടെയാണ് കസ്റ്റംസ് ജ്വല്ലറിയില്‍ പരിശോധന തുടങ്ങിയത്. ഉച്ചയോടെ രേഖകളുടെ പരിശോധന പൂര്‍ത്തിയാക്കി. ഹെസ ഗോള്‍ഡ് ആന്‍ഡ് ഡയമണ്ടില്‍ ഉണ്ടായിരുന്ന മുഴുവന്‍ സ്വര്‍ണവും അനധികൃതമാണെന്നും അതിനാല്‍ തന്നെ ഇത് കണ്ടുകെട്ടുമെന്നുമാണ് കസ്റ്റംസ് അറിയിച്ചത്. ജ്വല്ലറിയില്‍ പ്രദര്‍ശിപ്പിച്ച സ്വര്‍ണം മുഴുവന്‍ അളന്നുതൂക്കി പരിശോധിച്ച് മാറ്റിവെച്ചിട്ടുണ്ട്.