మొంథా తుఫాను కారణంగా ఆంధ్రప్రదేశ్‌లో నెలకొన్న అల్లకల్లోల పరిస్థితుల నేపథ్యంలో, ముఖ్యమంత్రి చంద్రబాబు నాయుడు తుఫాను ప్రభావిత ప్రాంతాల ప్రజలకు అండగా నిలిచేందుకు కీలక నిర్ణయం తీసుకున్నారు. లోతట్టు ప్రాంతాల నుంచి ప్రజలను సురక్షిత ప్రాంతాలకు తరలించిన అధికారులు, బాధితులకు సహాయక చర్యలు అందించేలా సీఎం చంద్రబాబు, మంత్రులు పవన్ కళ్యాణ్, నారా లోకేశ్ ఎప్పటికప్పుడు ఆదేశాలు జారీ చేస్తున్నారు. ఇందులో భాగంగా, తుఫాను వల్ల ఇబ్బందులు ఎదుర్కొంటున్న కుటుంబాలకు, మత్స్యకారులకు ఉచితంగా నిత్యావసర సరుకులను పంపిణీ చేయాలని రాష్ట్ర ప్రభుత్వం నిర్ణయించి, సంబంధిత అధికారులకు తక్షణమే ఉత్తర్వులు జారీ చేసింది.
ప్రభుత్వ ఆదేశాల ప్రకారం, తుఫాను ప్రభావిత ప్రాంతాల్లోని ప్రతి కుటుంబానికి కొన్ని ముఖ్యమైన నిత్యావసరాలను ఉచితంగా అందించనున్నారు. ఇందులో 25 కిలోల బియ్యం, కిలో కందిపప్పు, ఒక లీటరు వంట నూనె, కిలో ఉల్లిపాయలు, కిలో బంగాళాదుంపలు, మరియు కిలో చక్కెర ఉన్నాయి. ముఖ్యంగా, సముద్ర తీర ప్రాంతాల్లో నివసించే మత్స్యకార కుటుంబాలకు ప్రత్యేకంగా 50 కిలోల బియ్యాన్ని పంపిణీ చేయాలని ప్రభుత్వం నిర్ణయించింది. ఈ సాయం తుఫాను కారణంగా నష్టపోయిన ప్రజలకు భారీ ఊరటగా మారింది.
ఈ సహాయక చర్యలను వేగవంతం చేసేందుకు ఆంధ్రప్రదేశ్ ప్రభుత్వం శాఖల వారీగా బాధ్యతలను అప్పగించింది. బియ్యం, కందిపప్పు, వంట నూనె, చక్కెర వంటి సరుకుల సరఫరాను వెంటనే ప్రారంభించాలని పౌరసరఫరాల శాఖ కమిషనర్‌ను ఆదేశించింది. అదేవిధంగా, ఉల్లిపాయలు, బంగాళాదుంపలు, ఇతర కూరగాయల సేకరణ మరియు పంపిణీ బాధ్యతలను మార్కెటింగ్ శాఖ కమిషనర్‌కు అప్పగించారు. క్షేత్ర స్థాయిలో అధికారులు వెంటనే రంగంలోకి దిగి, బాధితులకు సకాలంలో సాయం అందేలా చూడాలని ముఖ్యమంత్రి చంద్రబాబు నాయుడు ప్రభుత్వం ఆదేశాలు జారీ చేసింది. ఉప ముఖ్యమంత్రి పవన్ కళ్యాణ్ కూడా ప్రభుత్వం అందిస్తున్న సాయం గురించి ఎక్స్ (X) లో ట్వీట్ చేశారు.
