భారత మహిళల క్రికెట్ జట్టు తొలిసారిగా వన్డే ప్రపంచకప్‌ను గెలుచుకుని చరిత్ర సృష్టించడంతో దేశవ్యాప్తంగా అంబరాన్ని తాకే సంబరాలు జరిగాయి. ఈ విజయాన్ని భారత్‌తో పాటు పాకిస్థాన్‌లోని ఒక కుటుంబం కూడా ఘనంగా జరుపుకోవడం అందరి దృష్టిని ఆకర్షించింది. పాకిస్థాన్ జెర్సీలు ధరించిన ఆ కుటుంబ సభ్యులు, భారత జట్టు ఫొటో ఉన్న కేక్‌ను కట్ చేస్తూ తమ ఆనందాన్ని వ్యక్తం చేశారు.
వారు సంబరాలు చేసుకున్న వీడియోలను సోషల్ మీడియాలో పోస్ట్ చేస్తూ, “టీమిండియాకు అభినందనలు… పాకిస్థాన్ నుంచి ప్రేమతో మద్దతు” అంటూ ప్రత్యేక సందేశం ఇచ్చారు. ఈ వీడియోల్లో చిన్నారులు టీవీలో కనిపిస్తున్న కెప్టెన్ హర్మన్‌ప్రీత్ కౌర్ ఫొటోకు కేక్ తినిపిస్తూ చూపిన సన్నివేశం నెటిజన్లను ఎంతగానో ఆకట్టుకుంది. ఈ అభిమానానికి భారత అభిమానులు పాజిటివ్‌గా స్పందిస్తూ పాకిస్థాన్ కుటుంబానికి ధన్యవాదాలు తెలిపారు.
ఫైనల్‌లో దక్షిణాఫ్రికాపై 52 పరుగుల తేడాతో విజయం సాధించిన భారత మహిళల జట్టు అద్భుతమైన ప్రదర్శన చేసింది. ఈ చారిత్రక విజయానికి జట్టుకు రూ.39 కోట్ల ప్రైజ్ మనీ లభించగా, బీసీసీఐ అదనంగా రూ.51 కోట్ల బహుమతిని కూడా ప్రకటించింది. క్రీడా స్ఫూర్తిని, రెండు దేశాల మధ్య ప్రేమను ప్రతిబింబిస్తున్న పాకిస్థానీ కుటుంబం వీడియోలు ఇప్పుడు అంతర్జాతీయంగా వైరల్ అవుతున్నాయి.
