ఐపీఎస్ అధికారి సంజయ్ బెయిల్ పిటిషన్పై ఈరోజు విజయవాడ ఏసీబీ కోర్టులో విచారణ జరగనుంది. ప్రభుత్వ నిధుల దుర్వినియోగం కేసులో ఆయన ప్రస్తుతం జ్యుడీషియల్ రిమాండ్లో ఉన్నారు. గత ప్రభుత్వంలో కీలకపాత్ర పోషించిన సంజయ్పై కూటమి ప్రభుత్వం అధికారంలోకి వచ్చిన తర్వాత ఈ కేసులు నమోదయ్యాయి. బెయిల్ పిటిషన్పై ఇరు పక్షాల వాదనలను ఏసీబీ కోర్టు ఈరోజు విననుంది. గతంలో పలుమార్లు సంజయ్ బెయిల్ పిటిషన్ కొట్టివేయబడిన నేపథ్యంలో, ఈరోజు న్యాయస్థానం ఇచ్చే తీర్పుపై ఉత్కంఠ నెలకొంది.
మరోవైపు, మాజీ పార్లమెంటు సభ్యుడు ఉండవల్లి అరుణ్ కుమార్ రాజకీయ అంచనాలు, జోస్యాలపై పార్టీ నేతలు స్పందించడం లేదు. ఆయన మాటలు ఉబుసుపోక చేసేవేనన్న నిర్ణయానికి నేతలు వచ్చినట్లు కనిపిస్తోంది. గత ఎన్నికలలో సంక్షేమ పథకాలు వైసీపీని గెలిపిస్తాయని ఉండవల్లి అంచనా వేసినప్పటికీ, ఆ పార్టీ కేవలం 11 సీట్లకే పరిమితమై, ఆయన జోస్యం తప్పింది. రాజకీయాలపై లోతుగా అధ్యయనం చేయకుండా, కేవలం తన వద్దకు వచ్చిన సమాచారంతోనే ఆయన అంచనాలు వేస్తున్నారని కొందరు నేతలు అభిప్రాయపడుతున్నారు.
ప్రస్తుత ఆంధ్రప్రదేశ్ రాజకీయ వాతావరణంలో రెండు, మూడు ప్రాంతీయ పార్టీలకు మాత్రమే అనువైన వాతావరణం ఉండటం, ఆయన వంటి ‘లిటిగెంట్’ను పార్టీల్లోకి తీసుకునేందుకు ఏ ప్రాంతీయ పార్టీ కూడా ప్రయత్నించకపోవచ్చన్న అభిప్రాయాలు వ్యక్తమవుతున్నాయి. అందుకే ఉండవల్లి ఎలాంటి వ్యాఖ్యలు చేసినా పార్టీ నేతలు పట్టించుకోవడం లేదు. ఈ నేపథ్యంలో, పెద్దాయన రాజకీయాల నుంచి రిటైర్ అయినట్లుగా మౌనంగా ఉండటం మంచిదేమోనన్న వ్యాఖ్యలు సోషల్ మీడియాలో బలంగా వినిపిస్తున్నాయి.
