భారత స్టార్ మహిళా క్రికెటర్ స్మృతి మంధాన, మ్యూజిక్ డైరెక్టర్ పలాశ్ ముచ్చల్ల వివాహం చివరి నిమిషంలో వాయిదా పడటం ప్రస్తుతం క్రీడా, సినీ వర్గాలలో చర్చనీయాంశంగా మారింది. సుమారు ఐదేళ్లుగా ప్రేమించుకున్న ఈ జంట ఆదివారం పెళ్లి చేసుకోవడానికి సిద్ధంగా ఉండగా, స్మృతి మంధాన తండ్రి అనారోగ్యం కారణంగా వేడుక అకస్మాత్తుగా వాయిదా పడింది. ఈ ఊహించని పరిణామం జరిగిన మరుసటి రోజే, అనారోగ్యం కారణంగా పలాశ్ ముచ్చల్ కూడా ఆసుపత్రిలో చేరి కోలుకోవడం అభిమానులను మరింత కలవరానికి గురిచేసింది.
పెళ్లి వాయిదా పడిన వెంటనే, స్మృతి మంధాన తన సోషల్ మీడియా ఖాతాలో కీలక మార్పులు చేయడం సంచలనం సృష్టించింది. తన ఇన్స్టాగ్రామ్ హ్యాండిల్లో పెళ్లికి సంబంధించిన పోస్టులు, ముఖ్యంగా తన స్నేహితుడు, సంగీత దర్శకుడు పలాశ్ ముచ్చల్తో నిశ్చితార్థం జరిగిన వీడియో కనిపించకుండా పోయింది. ఈ వీడియోలో స్మృతి ఎంగేజ్మెంట్ రింగ్ను చూపించగా, ఆమె స్నేహితులు మరియు తోటి క్రికెటర్లు అయిన జెమీమా రోడ్రిగ్స్, శ్రేయాంక పాటిల్ కూడా ఈ వీడియోను తమ సోషల్ మీడియా ఖాతాల నుండి తొలగించడం అనుమానాలను రేకెత్తించింది.
స్మృతి మంధాన ఖాతా నుంచి ఆ వీడియో డిలీట్ అయ్యిందా లేక హైడ్ చేయబడిందా అనే విషయంపై ఇంకా స్పష్టత లేనప్పటికీ, నెటిజన్లు మాత్రం ఆందోళన వ్యక్తం చేస్తున్నారు. అయితే, ఆశ్చర్యకరంగా పలాశ్ ముచ్చల్ మాత్రం తన ఇన్స్టా ఖాతాలో తాను స్మృతికి ప్రపోజ్ చేసిన వీడియోను అలాగే ఉంచడం గమనార్హం. ప్రస్తుతం స్మృతి మంధాన తండ్రి పూర్తిగా కోలుకున్న తర్వాతే వివాహ తేదీని తిరిగి ఖరారు చేయనున్నారు.
