తిరుమలలో శనివారం (డిసెంబర్ 6, 2025) భక్తుల రద్దీ అధికంగా ఉంది. దిత్వా తుపాను ప్రభావం తగ్గడంతో తిరుమలకు భక్తులు పోటెత్తారు. దీంతో శ్రీవారి దర్శనం కోసం భక్తులు గంటల తరబడి వేచి చూడాల్సిన పరిస్థితి ఏర్పడింది. ఈ రద్దీని దృష్టిలో ఉంచుకుని టీటీడీ అధికారులు కంపార్ట్మెంట్లలో వేచి ఉన్న భక్తులకు అవసరమైన ఏర్పాట్లను పర్యవేక్షిస్తున్నారు. నేడు, రేపు కూడా ఇదే స్థాయిలో రద్దీ కొనసాగే అవకాశం ఉందని అంచనా.
టీటీడీ అధికారులు విడుదల చేసిన వివరాల ప్రకారం, ఈరోజు తిరుమలలోని వైకుంఠం క్యూ కాంప్లెక్స్లోని పదిహేను కంపార్ట్మెంట్లలో భక్తులు శ్రీవారి దర్శనం కోసం వేచి ఉన్నారు. టోకెన్లు లేకుండా సర్వదర్శనం క్యూ లైన్లో ప్రవేశించిన భక్తులకు ఈరోజు శ్రీవారి దర్శనం పూర్తి కావడానికి 10 నుంచి 12 గంటల సమయం పడుతుంది. ఇక టైమ్ స్లాట్ దర్శనం భక్తులకు 5 గంటలకు పైగా వేచి ఉండాల్సి వస్తుంది. రూ. 300 ప్రత్యేక దర్శనం టికెట్లు కొనుగోలు చేసిన భక్తులకు కూడా దర్శనం కోసం 3 నుంచి 4 గంటల సమయం పట్టవచ్చని అధికారులు తెలిపారు.
మరోవైపు, టీటీడీ అధికారులు వైకుంఠ ద్వార దర్శనాల ఏర్పాట్లను కూడా ప్రకటించారు. డిసెంబర్ 30 నుంచి జనవరి 08 వరకు 10 రోజుల పాటు జరిగే ఈ దర్శనాలలో సామాన్య భక్తులకు పెద్దపీట వేస్తామని తెలిపారు. మొత్తం 182 గంటల దర్శన సమయంలో 164.15 గంటల సమయాన్ని సామాన్య భక్తులకే కేటాయించారు. ఈ పది రోజులలో 7.70 లక్షల మంది భక్తులకు దర్శనం కల్పించేందుకు ఏర్పాట్లు చేస్తున్నారు. ఈ 10 రోజులలో తిరుపతిలో సర్వదర్శనం టోకెన్ల జారీని రద్దు చేయడంతో పాటు, ప్రత్యేక దర్శనాలను కూడా రద్దు చేస్తూ టీటీడీ నిర్ణయం తీసుకుంది. నిన్న శ్రీవారిని 67,336 మంది భక్తులు దర్శించుకోగా, హుండీ ఆదాయం రూ. 3.68 కోట్లుగా ఉంది.
