పవర్ స్టార్ పవన్ కల్యాణ్, దర్శకుడు హరీశ్ శంకర్ కాంబినేషన్లో రూపొందుతున్న భారీ యాక్షన్ ఎంటర్టైనర్ ‘ఉస్తాద్ భగత్ సింగ్’ చిత్రంపై అభిమానుల్లో భారీ అంచనాలు నెలకొన్నాయి. ఈ సినిమాలో కీలక పాత్రలో నటిస్తున్న రాశీ ఖన్నా తాజాగా షూటింగ్ సెట్స్ నుంచి కొన్ని ఆసక్తికరమైన బీటీఎస్ (బిహైండ్ ది సీన్స్) వీడియోలను తన అధికారిక ఇన్స్టాగ్రామ్ ఖాతాలో అభిమానులతో పంచుకుంది.
ఈ వీడియోలను షేర్ చేస్తూ రాశీ ఖన్నా, “యాక్షన్, కట్ మధ్య నిశ్శబ్దం ఉంటుంది. కొన్నిసార్లు నవ్వులు కూడా ఉంటాయి” అంటూ దర్శకుడు హరీశ్ శంకర్ను ట్యాగ్ చేసింది. ఈ వీడియోలలో ఆమె షూటింగ్ను ఎంతగానో ఆస్వాదిస్తున్నట్లు స్పష్టంగా కనిపిస్తోంది. ఇదివరకు కూడా పవన్ కల్యాణ్తో కలిసి పనిచేయడం తనకెంతో గౌరవమని రాశీ పేర్కొంది. పవన్తో దిగిన సెల్ఫీని పంచుకుంటూ, ఈ సినిమా తనకు ఎప్పటికీ గుర్తుండిపోయే మధుర జ్ఞాపకం అని ఆమె తెలిపింది.
‘ఉస్తాద్ భగత్ సింగ్’ చిత్రంలో రాశీ ఖన్నా ‘శ్లోక’ అనే ముఖ్యమైన పాత్రలో నటిస్తున్నట్లు చిత్రబృందం గతంలో ప్రకటించింది. ఈ చిత్రంలో శ్రీలీల కూడా మరో కథానాయికగా నటిస్తుండగా, దేవి శ్రీ ప్రసాద్ సంగీతం అందిస్తున్నారు. మైత్రి మూవీ మేకర్స్ పతాకంపై నవీన్ యెర్నేని మరియు వై. రవిశంకర్ ఈ చిత్రాన్ని నిర్మిస్తున్నారు.
