తెలంగాణలో అత్యంత ఉత్కంఠ రేపుతున్న గ్రూప్-1 మెయిన్స్ పరీక్షా ఫలితాల చెల్లుబాటుపై హైకోర్టు తన తీర్పును వాయిదా వేసింది. ఈ కేసులో తుది తీర్పును ఫిబ్రవరి 5, 2026న వెల్లడించనున్నట్లు ప్రధాన న్యాయమూర్తి జస్టిస్ అపరేష్ కుమార్ సింగ్, జస్టిస్ జి.ఎం. మొహియుద్దీన్లతో కూడిన ధర్మాసనం గురువారం ప్రకటించింది. వాస్తవానికి ఈరోజే (జనవరి 22) తీర్పు వెలువడాల్సి ఉన్నప్పటికీ, తీర్పు కాపీ ఇంకా పూర్తిస్థాయిలో సిద్ధం కాలేదని ధర్మాసనం స్పష్టం చేస్తూ వాయిదా వేసింది.
గ్రూప్-1 మెయిన్స్ మూల్యాంకన ప్రక్రియలో లోపాలు ఉన్నాయంటూ గతంలో సింగిల్ జడ్జి ఇచ్చిన తీర్పును టీజీపీఎస్సీ (TGPSC) మరియు ఎంపికైన అభ్యర్థులు డివిజన్ బెంచ్లో సవాలు చేశారు. సింగిల్ జడ్జి గతంలో ఫలితాలను రద్దు చేస్తూ, తిరిగి మూల్యాంకనం చేయాలని లేదా మళ్లీ పరీక్ష నిర్వహించాలని ఆదేశించారు. అయితే, డివిజన్ బెంచ్ ఆ తీర్పుపై స్టే విధించి, నియామక ప్రక్రియను కొనసాగించేందుకు షరతులతో కూడిన అనుమతి ఇచ్చింది. ఈ నేపథ్యంలో ప్రభుత్వం ఇప్పటికే 562 మంది అభ్యర్థులకు నియామక పత్రాలను అందజేసింది.
హైకోర్టు వెలువరించే ఈ తుది తీర్పుపైనే ఇప్పుడు ఎంపికైన 562 మంది అధికారుల భవితవ్యం ఆధారపడి ఉంది. ఒకవేళ కోర్టు సింగిల్ జడ్జి తీర్పును సమర్థిస్తే నియామక ప్రక్రియ మళ్లీ మొదటికి వచ్చే అవకాశం ఉండటంతో అభ్యర్థుల్లో ఆందోళన నెలకొంది. మరోవైపు, పరీక్షలో అవకతవకలు జరిగాయని ఆరోపిస్తున్న అభ్యర్థులు తమకు న్యాయం జరుగుతుందని ఆశిస్తున్నారు. ఫిబ్రవరి 5న వచ్చే తీర్పుతో ఈ సుదీర్ఘ న్యాయపోరాటానికి తెరపడనుంది.
