టీ20 ప్రపంచకప్ 2026 నుంచి బంగ్లాదేశ్ను ఐసీసీ అనూహ్యంగా తొలగించింది. భారత్లో మ్యాచ్లు ఆడేందుకు నిరాకరించడమే ఇందుకు కారణం. భద్రతా కారణాల రీత్యా తమ మ్యాచ్లను భారత్ నుంచి శ్రీలంకకు మార్చాలని బంగ్లాదేశ్ చేసిన విజ్ఞప్తిని ఐసీసీ తోసిపుచ్చుతూ, ఈ కఠిన నిర్ణయం తీసుకుంది.
భారత్, శ్రీలంక సంయుక్తంగా ఆతిథ్యమిస్తున్న ఈ టోర్నీలో షెడ్యూల్ ప్రకారం బంగ్లాదేశ్ తమ ప్రాథమిక దశలోని నాలుగు మ్యాచ్లను కోల్కతా, ముంబైలలో ఆడాల్సి ఉంది. అయితే, భారత్లో భద్రతపై ఆందోళన వ్యక్తం చేసిన బంగ్లాదేశ్, తమ మ్యాచ్లను శ్రీలంకకు తరలించాలని కోరింది. ఈ అభ్యర్థనను ఐసీసీ తిరస్కరించడమే కాకుండా, తమ నిర్ణయాన్ని పునఃసమీక్షించుకోవడానికి బంగ్లాదేశ్కు 24 గంటల గడువు ఇచ్చింది. అయినప్పటికీ బంగ్లాదేశ్ తన వైఖరికే కట్టుబడి ఉండటంతో ఆ జట్టును టోర్నీ నుంచి తొలగించింది. వారి స్థానంలో స్కాట్లాండ్ను ఎంపిక చేసింది.
ఈ మొత్తం వివాదంపై సహ ఆతిథ్య దేశమైన శ్రీలంక తాజాగా స్పందించింది. భారత్, పాకిస్థాన్, బంగ్లాదేశ్ మధ్య వివాదాల్లో తాము తటస్థంగా ఉంటామని శ్రీలంక క్రికెట్ కార్యదర్శి బందుల దిస్సానాయకే ఏఎఫ్పీ వార్తా సంస్థతో అన్నారు. ఈ దేశాలన్నీ తమకు మిత్రదేశాలేనని ఆయన పేర్కొన్నారు. భవిష్యత్తులో ఏ దేశమైనా కోరితే టోర్నీలు నిర్వహించేందుకు సిద్ధంగా ఉన్నామని తెలిపారు.
మరోవైపు బంగ్లాదేశ్కు మద్దతుగా పాకిస్థాన్ కూడా టోర్నీని బహిష్కరించవచ్చని వార్తలు వస్తున్నాయి. ఇప్పటికే రాజకీయ ఉద్రిక్తతల కారణంగా పాకిస్థాన్ తమ ప్రపంచకప్ మ్యాచ్లను శ్రీలంకలోనే ఆడుతోంది. భారత్తో జరగాల్సిన మ్యాచ్ కూడా అక్కడే జరగనుంది. టోర్నీని విజయవంతంగా నిర్వహించడానికి అత్యధిక ప్రాధాన్యత ఇస్తున్నామని, ముఖ్యంగా భారత్-పాకిస్థాన్ మ్యాచ్లకు ప్రత్యేక శ్రద్ధ తీసుకుంటున్నామని శ్రీలంక క్రీడల మంత్రి సునీల్ కుమార గమాగే తెలిపారు. టీ20 ప్రపంచకప్ 2026 ఫిబ్రవరి 7న ప్రారంభమై, మార్చి 8న ఫైనల్తో ముగియనుంది.
