మహా శివరాత్రి సందర్భంగా శైవక్షేత్రాలకు వెళ్లే భక్తుల రద్దీని దృష్టిలో ఉంచుకుని టీజీఎస్ఆర్టీసీ మొత్తం 2,243 ప్రత్యేక బస్సులను నడపాలని నిర్ణయించింది. ఈ నెల 14 నుంచి 16వ తేదీ వరకు ఈ సర్వీసులు అందుబాటులో ఉంటాయి. రాష్ట్రవ్యాప్తంగా ఉన్న 43 ప్రముఖ శైవక్షేత్రాలకు ఈ బస్సులను అనుసంధానం చేశారు. గత ఏడాదితో పోలిస్తే భక్తుల సౌకర్యార్థం ఈసారి అదనంగా మరో 208 బస్సులను పెంచడం విశేషం.
ముఖ్యంగా భక్తులు ఎక్కువగా సందర్శించే శ్రీశైలం క్షేత్రానికి 781 బస్సులను కేటాయించారు. అలాగే వేములవాడకు 416, కీసరగుట్టకు 326, మరియు ఏడుపాయలకు 249 బస్సులను నడుపుతున్నారు. ఇవే కాకుండా కాళేశ్వరం, కొమురవెల్లి, రామప్ప, పాలకుర్తి వంటి పుణ్యక్షేత్రాలకు కూడా ప్రత్యేక సర్వీసులు ఉంటాయి. హైదరాబాద్లోని ఎంజీబీఎస్, జేబీఎస్, కేపీహెచ్బీ వంటి ప్రధాన ప్రాంతాల నుంచి శ్రీశైలానికి వెళ్లే బస్సులకు ముందస్తు రిజర్వేషన్ సౌకర్యం కూడా కల్పించారు.
టికెట్ ధరల విషయానికి వస్తే, ప్రత్యేక బస్సుల్లో ఛార్జీలను సాధారణం కంటే 1.5 రెట్లు పెంచారు. అయితే, ఈ పెంపు కేవలం స్పెషల్ బస్సులకు మాత్రమే వర్తిస్తుందని, రెగ్యులర్ సర్వీసుల్లో పాత ధరలే ఉంటాయని అధికారులు స్పష్టం చేశారు. మహిళా భక్తులకు మరో తీపి కబురు ఏమిటంటే, ఈ ప్రత్యేక బస్సుల్లో కూడా మహాలక్ష్మి పథకం కింద ఉచిత ప్రయాణ సదుపాయం వర్తిస్తుంది. ప్రయాణికుల కోసం బస్టాండ్ల వద్ద తాగునీరు, నీడ కోసం టెంట్లు వంటి సౌకర్యాలను కూడా ఆర్టీసీ సిద్ధం చేసింది.
