ప్రముఖ కవి, బాలీవుడ్ సినీ గీత రచయిత జావేద్ అక్తర్ మరోసారి పాకిస్థాన్పై తనదైన శైలిలో విమర్శలు గుప్పించారు. పాకిస్థాన్లోని హిందూ మైనారిటీల గురించి ఆ దేశ అధ్యక్షుడు ఆసిఫ్ అలీ జర్దారీ చేసిన వ్యాఖ్యలపై ఆయన తీవ్రంగా స్పందించారు. జర్దారీపై ఉన్న పాత అవినీతి ఆరోపణలను గుర్తుచేస్తూ, ‘మిస్టర్ 10%’ అంటూ ఎద్దేవా చేస్తూ ఆయనకు గట్టి కౌంటర్ ఇచ్చారు.
అసలేం జరిగిందంటే..
పాకిస్థాన్ స్వాతంత్ర్య దినోత్సవం సందర్భంగా జరిగిన ఒక కార్యక్రమంలో అధ్యక్షుడు ఆసిఫ్ అలీ జర్దారీ ప్రసంగించారు. దేశంలో 3-4 శాతం ఉన్న హిందూ జనాభాను తాము ‘భరిస్తున్నామని’ (tolerate), వారికి పూర్తి స్వేచ్ఛ ఉందని అన్నారు. భారత్తో పోలిస్తే పాకిస్థాన్లోనే నివసించడానికి వారు ఇష్టపడతారని వ్యాఖ్యానించారు. ఈ సందర్భంగా ఆయన ‘అఖండ భారత్’ ఆలోచనను కూడా ప్రస్తావించారు. జర్దారీ చేసిన ఈ వ్యాఖ్యల వీడియో సోషల్ మీడియాలో వైరల్ అయింది.
జావేద్ అక్తర్ ఘాటు స్పందన
జర్దారీ వ్యాఖ్యలపై జావేద్ అక్తర్ ‘ఎక్స్’ వేదికగా స్పందించారు. జర్దారీపై గతంలో ఉన్న ‘మిస్టర్ 10%’ అనే అవినీతి ఆరోపణల నిక్నేమ్ను ప్రస్తావిస్తూ ఓ పోస్ట్ పెట్టారు. “బెనజీర్ భుట్టోను వివాహం చేసుకున్న తర్వాత వెలుగులోకి వచ్చిన పాకిస్థాన్ అధ్యక్షుడు మిస్టర్ జర్దారీ.. తమ దేశంలో 3-4 శాతం ఉన్న హిందూ జనాభాను సహిస్తున్నామని అంటున్నారు. మిస్టర్ జర్దారీ, నాకు అర్థమైంది.. 10 శాతం కంటే తక్కువ ఉన్న దేనినీ మీరు ఎప్పుడూ పట్టించుకోరు కదా” అని జావేద్ అక్తర్ తన పోస్టులో వ్యంగ్యాస్త్రాలు సంధించారు. ప్రభుత్వ ప్రాజెక్టులలో 10 శాతం కమీషన్ తీసుకుంటారనే ఆరోపణలతో జర్దారీకి ‘మిస్టర్ 10%’ అనే పేరు స్థిరపడింది. ఇప్పుడు అదే పేరుతో జావేద్ అక్తర్ విమర్శించడం చర్చనీయాంశంగా మారింది.
గతంలో కూడా జావేద్ అక్తర్ అనేక సందర్భాల్లో ఉగ్రవాదం, ద్వైపాక్షిక సంబంధాల విషయంలో పాకిస్థాన్ను బహిరంగంగా విమర్శించారు. ఇక, ఈ ఏడాది ఫిబ్రవరిలో జరిగిన ఎన్నికల అనంతరం ఏర్పడిన సంకీర్ణ ప్రభుత్వంలో భాగంగా మార్చి 2024లో ఆసిఫ్ అలీ జర్దారీ పాకిస్థాన్ 14వ అధ్యక్షుడిగా బాధ్యతలు స్వీకరించిన విషయం తెలిసిందే.
