డీఆర్‌డీఓ తన ప్రస్థానంలో మరో కీలక విజయాన్ని తన ఖాతాలో వేసుకుంది. దేశీయంగా అభివృద్ధి చేసిన హై-ఆల్టిట్యూడ్ ప్లాట్‌ఫామ్ సిస్టమ్ (హెచ్ఏపీఎస్) ప్రయోగాత్మక పరీక్షను మంగళవారం విజయవంతంగా పూర్తి చేసింది. ఈ ప్రయోగంలో భాగంగా ఎయిర్ షిప్ ఏకంగా 21 కిలోమీటర్ల ఎత్తుకు చేరుకుని, భారత నిఘా, వైమానిక సామర్థ్యాలను బలోపేతం చేసే దిశగా ఒక ముఖ్యమైన విజయాన్ని నమోదు చేసింది.
రక్షణ మంత్రిత్వ శాఖ వెల్లడించిన వివరాల ప్రకారం, ఈ ప్రయోగాత్మక ఎయిర్ షిప్ సముద్ర మట్టానికి 21 కిలోమీటర్ల ఎత్తుకు చేరుకుంది. అనంతరం సుమారు 20 కిలోమీటర్ల ఎత్తులో 30 నిమిషాలకు పైగా స్థిరంగా ప్రయాణించి తన సామర్థ్యాన్ని నిరూపించుకుంది. ప్రయోగం ముగిసిన తర్వాత కమాండ్ మేరకు ఇది సురక్షితంగా భూమికి చేరుకుంది. ఈ ప్రక్రియలో ప్లాట్‌ఫామ్ నుంచి రియల్-టైమ్ వీడియోతో పాటు వాహన పనితీరుకు సంబంధించిన డేటా నిరంతరాయంగా గ్రౌండ్ కంట్రోల్ స్టేషన్‌కు చేరింది.
ఆగ్రాలోని డీఆర్‌డీవో అనుబంధ ల్యాబొరేటరీ అయిన ‘ఏరియల్ డెలివరీ రీసెర్చ్ అండ్ డెవలప్‌మెంట్ ఎస్టాబ్లిష్‌మెంట్’ (ఏడీఆర్‌డీఈ) ఈ ప్లాట్‌ఫామ్‌ను డిజైన్ చేసి అభివృద్ధి చేస్తోంది. గాలి కంటే తేలికైన ఈ వ్యవస్థను సుదీర్ఘ కాలం పాటు గగనతలంలో నిరంతరాయంగా పనిచేసేలా రూపొందిస్తున్నారు. ఇది నిఘా, కమ్యూనికేషన్స్ వంటి కీలక కార్యకలాపాలకు ఎంతగానో దోహదపడుతుంది. భారత వైమానిక దళం (ఐఏఎఫ్), డీజీసీఏ, ఏఏఐ వంటి పలు సంస్థల సమన్వయంతో ఈ ఫ్లైట్ ట్రయల్‌ను నిర్వహించారు.
ఈ అద్భుత విజయంపై కేంద్ర రక్షణ మంత్రి రాజ్‌నాథ్ సింగ్ హర్షం వ్యక్తం చేశారు. ఈ సందర్భంగా డీఆర్‌డీఓ శాస్త్రవేత్తలను, వైమానిక దళాన్ని ఇతర భాగస్వామ్య సంస్థలను ఆయన అభినందించారు. అధునాతన ఏరోస్పేస్ సాంకేతిక పరిజ్ఞానంలో స్వయం సమృద్ధి సాధించే దిశగా ఇది ఒక కీలక మైలురాయి అని ఆయన కొనియాడారు.
