తమ పార్టీ సహ కన్వీనర్లు సౌరవ్‌ దాస్‌, ఆశుతోష్‌ రంకాలను అరెస్టు చేయడాన్ని నిరసిస్తూ అక్టోబర్‌ 16న ఢిల్లీలోని కన్నాట్‌ ప్లేస్‌లో త్రివర్ణ పతాక ప్రదర్శన నిర్వహించనున్నట్లు కాక్రోచ్‌ జనతా పార్టీ (సీజేపీ) వ్యవస్థాపకుడు అభిజీత్‌ దీప్కే ప్రకటించారు. దేశభక్తులంతా జాతీయ జెండాలతో సెంట్రల్‌ పార్క్‌కు రావాలని పిలుపునిచ్చారు.
సోషల్‌ మీడియా వేదిక ‘ఎక్స్‌’లో విడుదల చేసిన వీడియో సందేశంలో ఈ నిరసనకు ‘లెహ్రావో దో తిరంగా’ అని పేరు పెట్టినట్లు దీప్కే తెలిపారు. కేవలం త్రివర్ణ పతాకాన్ని ప్రదర్శించినందుకే సౌరవ్‌ దాస్‌, ఆశుతోష్‌ రంకాలను జైలుకు పంపారని ఆయన ఆరోపించారు. అక్టోబర్‌ 16న సాయంత్రం 5 గంటలకు కన్నాట్‌ ప్లేస్‌లోని సెంట్రల్‌ పార్క్‌కు జాతీయ జెండాలతో చేరుకోవాలని కోరారు. త్రివర్ణ పతాకాన్ని ఎగురవేయడం నేరం కాదని ఈ కార్యక్రమం ద్వారా చాటిచెబుతామని అన్నారు.
ఢిల్లీకి రాలేని వారు తమ ప్రాంతాల్లో తిరంగా మార్చ్‌లు నిర్వహించాలని దీప్కే విజ్ఞప్తి చేశారు. జాతీయ జెండా తమ గర్వకారణమని, దాన్ని ప్రదర్శించడం నేరం కాదనే సందేశాన్ని అందించాలని కోరారు. ఈ నిరసన తర్వాత తనను కూడా అరెస్టు చేసే అవకాశం ఉందని, అయినా ఆందోళన చెందడం లేదని చెప్పారు. ఎట్టి పరిస్థితుల్లోనూ త్రివర్ణ పతాకాన్ని ప్రదర్శిస్తానని స్పష్టం చేశారు.
ఐదు రోజుల జ్యుడీషియల్‌ కస్టడీ
మరోవైపు, జంతర్‌ మంతర్‌లోకి అక్రమంగా ప్రవేశించిన కేసులో సౌరవ్‌ దాస్‌, ఆశుతోష్‌ రంకాలకు బుధవారం ఐదు రోజుల జ్యుడీషియల్‌ కస్టడీ విధించారు. సీజేపీకి చెందిన మరో నేత అజింక్య షిండే వ్యక్తిగత పూచీకత్తుపై విడుదలయ్యారు.
దాస్‌ను తీహార్‌ జైలులోని రెండో నంబర్‌ జైలులో, రంకాను నాలుగో నంబర్‌ జైలులో వేర్వేరుగా ఉంచినట్లు ఈ వ్యవహారంతో సంబంధం ఉన్న వర్గాలు తెలిపాయి. ముగ్గురు సీజేపీ సభ్యులను జంతర్‌ మంతర్‌లోకి చొరబడినందుకు ముందస్తు నిర్బంధంలోకి తీసుకున్నారు. జంతర్‌ మంతర్‌ను నిరసనలకు కేటాయించిన అధికారిక ప్రదేశాల జాబితా నుంచి తొలగించిన నేపథ్యంలో ఈ చర్యలు తీసుకున్నట్లు సమాచారం.
