తిరుమల తిరుపతి దేవస్థానం (TTD) 2026 జనవరి నెలకు సంబంధించిన దర్శనాలు, ఆర్జిత సేవలు, మరియు వసతి కోటా విడుదల తేదీలను ప్రకటించింది. భక్తులు ఆన్‌లైన్‌లో తమ దర్శనం, వసతిని ముందుగానే బుక్ చేసుకోవడానికి వీలుగా టీటీడీ ఈ షెడ్యూల్‌ను ఖరారు చేసింది. ముఖ్యంగా, ఆర్జిత సేవా టికెట్లు (ఎలక్ట్రానిక్ డిప్ కోసం) మరియు అంగప్రదక్షిణ టోకెన్ల కోటాను అక్టోబర్ 19న ఉదయం 10 గంటలకు టీటీడీ అధికారిక వెబ్‌సైట్‌లో విడుదల చేయనుంది. ఈ డిప్ టికెట్ల కోసం భక్తులు అక్టోబర్ 21 ఉదయం 10 గంటల వరకు నమోదు చేసుకోవచ్చు.
నాన్-డిప్ ఆర్జిత సేవా టికెట్లు (కళ్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవ) కోటాను అక్టోబర్ 23న ఉదయం 10 గంటలకు విడుదల చేయనున్నారు. అదే రోజు మధ్యాహ్నం 3 గంటలకు వర్చువల్ సేవల కోటాను విడుదల చేస్తారు. ఇక శ్రీవాణి ట్రస్టు దర్శన టికెట్ల కోటాను అక్టోబర్ 24న ఉదయం 11 గంటలకు, అలాగే వృద్ధులు, దివ్యాంగుల ఉచిత ప్రత్యేక దర్శన టోకెన్ల కోటాను అదే రోజు మధ్యాహ్నం 3 గంటలకు టీటీడీ ఆన్‌లైన్‌లో విడుదల చేయనుంది.
భక్తులందరూ అధికంగా బుక్ చేసుకునే ప్రత్యేక ప్రవేశ దర్శన టికెట్ల (రూ. 300) కోటాను అక్టోబర్ 25న ఉదయం 10 గంటలకు టీటీడీ ఆన్‌లైన్‌లో విడుదల చేస్తుంది. అలాగే, తిరుమల మరియు తిరుపతిలలోని గదుల వసతి కోటాను కూడా అక్టోబర్ 25న మధ్యాహ్నం 3 గంటలకు విడుదల చేస్తారు. జనవరి నెలలో రద్దీని దృష్టిలో ఉంచుకుని, భక్తులు ఈ షెడ్యూల్‌ను గమనించి, టీటీడీ అధికారిక వెబ్‌సైట్ https://ttdevasthanams.ap.gov.in ద్వారా ముందస్తుగా తమ టికెట్లను బుక్ చేసుకోవాలని టీటీడీ కోరింది.
