శ్రీ సత్యసాయి జిల్లా, కదిరి మండలం కాళసముద్రం గ్రామ సమీపంలో అత్యంత దారుణమైన సంఘటన చోటుచేసుకుంది. రెండు రోజుల పసికందును ఎవరో కసాయి తల్లి నిర్మానుష్య ప్రదేశంలో వదిలిపెట్టి వెళ్లిపోయింది. పసికందును వదిలివెళ్లిన తీరు స్థానికులను తీవ్రంగా కలచివేసింది.
ఆ ప్రాంతంలో గమనించిన స్థానికులు వెంటనే స్పందించి, ఆ పసికందును రక్షించే ప్రయత్నం చేశారు. అనంతరం ఈ విషయం గురించి పోలీసులకు సమాచారం అందించారు. సమాచారం అందుకున్న పోలీసులు హుటాహుటిన ఘటనా స్థలానికి చేరుకున్నారు.
పోలీసులు వెంటనే ఆ పసికందును చికిత్స నిమిత్తం కదిరి ప్రభుత్వ ఆసుపత్రికి తరలించారు. ప్రస్తుతం ఆసుపత్రిలో పసికందుకు చికిత్స అందిస్తున్నారు. పోలీసులు కేసు నమోదు చేసి, ఆ కసాయి తల్లిని గుర్తించేందుకు మరియు ఈ దారుణానికి గల కారణాలను తెలుసుకునేందుకు దర్యాప్తు ప్రారంభించారు.
