నారా కుటుంబంలో మరో శుభసందడి నెలకొంది. యువ హీరో నారా రోహిత్, శిరీష లేళ్ల వివాహం అక్టోబర్ 30న రాత్రి 10.35 గంటలకు హైదరాబాద్‌లో జరగనుంది. ‘ప్రతినిధి 2’ సినిమాలో కలిసి నటించిన తర్వాత ప్రేమించుకున్న వీరు ఇప్పుడు జీవిత బంధంతో ఒక్కటవుతున్నారు. గత ఏడాది కుటుంబ సభ్యుల సమ్మతితో వీరి నిశ్చితార్థం జరిగింది. అయితే, రోహిత్ తండ్రి నారా రామమూర్తి నాయుడు మృతి కారణంగా వివాహం వాయిదా పడింది. ప్రస్తుతం అన్ని అనుకూల పరిస్థితులు ఏర్పడటంతో, రోహిత్ మరియు శిరీష ఇద్దరూ కొత్త అధ్యాయాన్ని ప్రారంభించడానికి సిద్ధమవుతున్నారు.
తాజా సమాచారం ప్రకారం, ఈ వివాహ వేడుకకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు – భువనేశ్వరి దంపతులు పెద్దలుగా వ్యవహరించనున్నారు. ఈ పెళ్లికి రాజకీయ, సినీ ప్రముఖులు పెద్ద ఎత్తున హాజరు కానున్నట్లు కుటుంబ వర్గాలు తెలిపాయి. నారా కుటుంబ సభ్యులు, స్నేహితులు మరియు పరిశ్రమ ప్రముఖుల రాకతో వివాహ ఏర్పాట్లు ఇప్పటికే జోరుగా సాగుతున్నాయి. నారావారి ఇళ్లలో పండుగ వాతావరణం నెలకొంది.
వివాహ వేడుకలు అక్టోబర్ 25న హల్దీ కార్యక్రమంతో ప్రారంభం కానున్నాయి. 26న పెళ్లికొడుకు చేయడం, 28న మెహందీ వేడుక, అనంతరం అక్టోబర్ 30న ప్రధాన వివాహం జరగనుంది. ఇటీవల శిరీష ‘పసుపు దంచడం’ ఫోటోలు సోషల్ మీడియాలో వైరల్ కావడంతో అభిమానులు ఈ శుభవార్త కోసం ఎదురు చూస్తున్నారు. నారా రోహిత్ తన వృత్తిపరమైన జీవితంతో పాటు వ్యక్తిగత జీవితంలో కూడా కొత్త ప్రయాణం ప్రారంభించబోతున్న సందర్భంగా, అభిమానులు మరియు సినీ పరిశ్రమ స్నేహితులు సోషల్ మీడియాలో శుభాకాంక్షలు తెలియజేస్తున్నారు. ఈ వివాహం రాజకీయ మరియు సినీ వర్గాల్లో ప్రధాన చర్చనీయాంశంగా మారింది.
