ఆంధ్రప్రదేశ్ రాష్ట్రం గ్లోబల్ ఇన్నోవేషన్ హబ్‌గా రూపుదిద్దుకునే దిశగా అడుగులు వేస్తోందని ఐటీ, విద్యుత్ శాఖ మంత్రి నారా లోకేష్ తెలిపారు. ఆస్ట్రేలియా పర్యటనలో భాగంగా మెల్బోర్న్‌లో గ్లోబల్ హెల్త్ ఇన్సూరెన్స్ దిగ్గజమైన బూపా ఏషియా పసిఫిక్ సీఓఓ బిజల్ సేజ్‌పల్‌తో ఆయన కీలక సమావేశం నిర్వహించారు. ఐటీ, డిజిటల్ హెల్త్‌కేర్‌కు హబ్‌గా ఉన్న విశాఖపట్నంలో ఒక గ్లోబల్ కెపాబిలిటీ సెంటర్ (GCC) ను స్థాపించాలని ఈ సందర్భంగా మంత్రి లోకేష్ బూపా సంస్థను ఆహ్వానించారు. అంతేకాకుండా, బూపా నైపుణ్యాన్ని ఉపయోగించుకుని గ్రామీణ డిజిటల్ ఆరోగ్య సేవల్లో ఏపీ ప్రభుత్వంతో వ్యూహాత్మక సహకారాన్ని అందించాలని ప్రతిపాదించారు.
నారా లోకేష్ ఈ సందర్భంగా ‘విజన్ 2047 – స్వర్ణాంధ్ర రోడ్‌మ్యాప్’ కీలక అంశాలను వివరించారు. ఈ విజన్‌లో, 2047 నాటికి రాష్ట్రం $2.4 ట్రిలియన్ GSDP మరియు $42 వేల తలసరి ఆదాయాన్ని లక్ష్యంగా పెట్టుకుంది. ఈ లక్ష్యాలను చేరుకోవడానికి AI, సెమీకండక్టర్లు, డిఫెన్స్, డేటా సెంటర్లు, క్లీన్ ఎనర్జీ వంటి కీలక రంగాల్లో వృద్ధిని సాధించేందుకు 24 థీమాటిక్ పాలసీలను అమలు చేయనున్నట్లు మంత్రి పేర్కొన్నారు. అలాగే, పరిశ్రమలు, విద్య మరియు సాంకేతికతలను నిలువు (వర్టికల్), క్షితిజ సమాంతర (హారిజాంటల్) సమన్వయం (ఇంటిగ్రేషన్) ద్వారా అనుసంధానించడమే రాష్ట్ర లక్ష్యమన్నారు.
విజన్ 2047లో భాగంగా, ఆంధ్రప్రదేశ్ దేశానికి ‘తూర్పు వంతెన గేట్‌వే’గా (Eastern Bridge Gateway) మారాలని లక్ష్యంగా పెట్టుకుంది. రాష్ట్రంలో ఉన్న 10 ఆపరేషనల్ మరియు గ్రీన్‌ఫీల్డ్ పోర్టుల ద్వారా భారతదేశ తూర్పు తీరంలో జరిగే మొత్తం కార్గో రవాణాలో 40% వాటాను హ్యాండిల్ చేయాలని ప్రభుత్వం ఆకాంక్షిస్తోంది. లోకేష్ ప్రతిపాదనలకు సానుకూలంగా స్పందించిన బూపా సీఓఓ బిజల్ సేజ్‌పల్, గ్రామీణ డిజిటల్ హెల్త్‌కేర్ సహా ఇతర ప్రతిపాదనలను తమ ఉన్నత స్థాయి బృందం సానుకూలంగా పరిశీలిస్తుందని హామీ ఇచ్చారు. ఈ సమావేశం గ్లోబల్ ఇన్నోవేషన్ భాగస్వామ్యాల వైపు ఆంధ్రప్రదేశ్ వేస్తున్న ముఖ్య అడుగుగా పరిగణించవచ్చు.
