ఆసియా కప్ రైజింగ్ స్టార్స్ 2025 టోర్నమెంట్‌లో టీమిండియా యంగ్ స్టార్ వైభవ్ సూర్యవంశీ తన ధనాధన్ బ్యాటింగ్‌తో సంచలనం సృష్టిస్తున్నాడు. కేవలం 14 ఏళ్ల వయసులోనే అంతర్జాతీయ వేదికపై వరుస రికార్డులు బద్దలు కొడుతూ, భారత క్రికెట్ భవిష్యత్‌ స్టార్‌గా ముందుకు సాగుతున్నాడు. ఈ టోర్నమెంట్‌లో వైభవ్ ఇప్పటివరకు ఆడిన 11 టీ20 మ్యాచ్‌లలో 466 పరుగులు సాధించాడు. కేవలం 211 బంతుల్లోనే 220.85 స్ట్రైక్ రేట్‌తో బ్యాటింగ్ చేసిన అతను, ఈ పరుగులలో ఏకంగా 44 సిక్సర్లు బాదాడు. అతని విధ్వంసకరమైన ఆటతీరు ప్రత్యర్థి బౌలర్లను దిగ్భ్రాంతికి గురిచేస్తోంది.
ఈ టోర్నమెంట్‌లో వైభవ్ తన పవర్ హిట్టింగ్‌ను తొలి మ్యాచ్ నుంచే మొదలుపెట్టాడు. యూఏఈపై సునామీ నాక్ ఆడిన అతను, కేవలం 32 బంతుల్లో సెంచరీ కొట్టి రికార్డు సృష్టించాడు. మొత్తం 144 పరుగులు చేసిన ఆ ఇన్నింగ్స్‌ను 342 స్ట్రైక్ రేట్‌తో కొనసాగించాడు. ఈ ఇన్నింగ్స్‌లో 11 ఫోర్లు, 15 సిక్సర్లు ఉన్నాయి. ఈ ఇన్నింగ్స్ టోర్నమెంట్‌కు కొత్త టోన్ సెట్ చేయడంతో పాటు, వైభవ్ అంతర్జాతీయ క్రికెట్ వర్గాల దృష్టిని ఆకర్షించాడు. అతని బ్యాటింగ్ స్టైల్, ఫుట్‌వర్క్, షాట్ సెలెక్షన్ ఎంతో మంది ప్రశంసలు అందుకుంటున్నాయి.
వైభవ్ సూర్యవంశీ టీ20 క్రికెట్‌లో అతి చిన్న వయస్సులోనే రెండు సెంచరీలు కొట్టి ప్రపంచ రికార్డు సృష్టించాడు. ఫ్రాన్స్ ఆటగాడు గుస్తావ్ మెక్‌కాన్ పేరిట ఉన్న రికార్డును వైభవ్ కేవలం 14 ఏళ్ల 232 రోజుల్లో బద్దలు కొట్టాడు. ఈ రోజు (శుక్రవారం) ఇండియా-ఏ, బంగ్లాదేశ్-ఏ మధ్య జరగనున్న సెమీఫైనల్ మ్యాచ్‌లో మరోసారి సునామీ సృష్టిస్తానని వైభవ్ ధీమా వ్యక్తం చేశాడు. అతని బ్యాటింగ్‌కు సంబంధించి, “200 పరుగులు చేసినా నాన్న సంతోషపడరు… ఇంకో 10 చేయాల్సింది అంటారు” అని వైభవ్ బీసీసీఐకి ఇచ్చిన ఇంటర్వ్యూలో సరదాగా వ్యాఖ్యానించాడు.
