చెన్నై సూపర్ కింగ్స్ (CSK) మాజీ క్రికెటర్, వరల్డ్ కప్ విన్నర్ క్రిష్ శ్రీకాంత్ తనయుడు అనిరుధ్ శ్రీకాంత్, తమిళ నటి, బిగ్బాస్ ఫేమ్ సంయుక్త షణ్ముగనాథన్ను గురువారం (నవంబర్ 27) చెన్నైలో వివాహం చేసుకున్నారు. వీరిద్దరికీ ఇది రెండో వివాహం కావడం విశేషం. సంయుక్త తన కుమారుడి సమక్షంలో అనిరుధ్ శ్రీకాంత్తో కలిసి ఏడడుగులు వేశారు. ఈ వివాహానికి పరిమిత సంఖ్యలో అతిథులు హాజరయ్యారు.
అనిరుధ్ శ్రీకాంత్ నేపథ్యం విషయానికి వస్తే, ఆయన 1983 క్రికెట్ ప్రపంచకప్ విన్నర్ క్రిష్ శ్రీకాంత్ కుమారుడు. దేశవాళీ క్రికెట్లో తమిళనాడు తరఫున ఆడిన అనిరుధ్, ఐపీఎల్లో చెన్నై సూపర్ కింగ్స్ మరియు సన్రైజర్స్ హైదరాబాద్ జట్లకు ప్రాతినిధ్యం వహించాడు. ఆటకు వీడ్కోలు పలికిన తర్వాత కామెంటేటర్గా మారిన అనిరుధ్, గతంలో ఆర్తి వెంకటేష్ను వివాహం చేసుకుని విడాకులు తీసుకున్నాడు.
సంయుక్త షణ్ముగనాథన్ మోడల్గా కెరీర్ ప్రారంభించి, 2007లో మిస్ చెన్నైగా నిలిచింది. ఆమె తమిళ బిగ్బాస్ సీజన్ 4తో బాగా ప్రాచుర్యం పొందింది. ఆ తర్వాత దళపతి విజయ్ నటించిన ‘వారిసు’తో పాటు పలు చిత్రాల్లో నటించింది. సంయుక్త గతంలో షార్ట్ ఫిల్మ్ డైరెక్టర్ కార్తీక్ శంకర్ను వివాహం చేసుకుని విడాకులు తీసుకున్నారు. వీరికి ఒక కుమారుడు ఉన్నాడు. ప్రస్తుతం వీరి పెళ్లి ఫోటోలు సోషల్ మీడియాలో వైరల్ అవుతున్నాయి.
