మొంథా తుఫాను ప్రభావంతో తెలంగాణలోని పలు జిల్లాల్లో గత కొన్ని గంటలుగా కుండపోత వర్షాలు కురుస్తున్నాయి. దీని ఫలితంగా వరంగల్, హన్మకొండ, కాజీపేట ప్రాంతాలలో భారీ వర్షాలు పడటంతో, పరిస్థితి తీవ్రంగా మారింది. లోతట్టు ప్రాంతాలు పూర్తిగా జలమయం అయ్యాయి. ముఖ్యంగా వరంగల్ జిల్లా కల్లెడలో అత్యధికంగా 34 సెంటీమీటర్ల వర్షపాతం, కాపులకనపర్తిలో 25.23 సెంటీమీటర్ల వర్షపాతం నమోదైంది. ఈ నేపథ్యంలో, హన్మకొండ జిల్లా కలెక్టర్ శారద వరంగల్, హన్మకొండ, కాజీపేట పరిధిలో రెడ్ అలర్ట్‌ను జారీ చేశారు. ప్రజలు అత్యవసరమైతే తప్ప బయటకు రావద్దని అధికారులు హెచ్చరికలు జారీ చేశారు.
భారీ వర్షాల కారణంగా రోడ్లన్నీ జలమయం కావడం, వాగులు, వంకలు ఉప్పొంగడం వల్ల జనజీవనం స్తంభించింది. హన్మకొండ బస్టేషన్‌లోకి కూడా వరద నీరు భారీగా చేరింది. పట్టాలపైకి వరద నీరు చేరడంతో రైళ్ల రాకపోకలకు తీవ్ర అంతరాయం కలిగింది. దాదాపు రెండు అడుగుల మేర నీరు నిలిచిపోవడంతో గోల్కొండ ఎక్స్‌ప్రెస్ను నిలిపివేశారు. అలాగే, మహబూబాబాద్‌లో కృష్ణా ఎక్స్‌ప్రెస్ ఐదు గంటల పాటు నిలిచిపోయింది. దీంతో ఆయా రైళ్లను దారి మళ్లించి, ప్రయాణికులను బస్సుల్లో గమ్యస్థానాలకు పంపించారు. నిలిచిపోయిన ప్రయాణికులకు పోలీసులు, స్వచ్ఛంద సంస్థలు ఆహారం, పానీయాలను అందించి మానవతా సహాయం అందించారు.
తుఫాను తీవ్రత దృష్ట్యా, జిల్లా కలెక్టర్ శారద వరంగల్, హన్మకొండ జిల్లాల ప్రజల సౌలభ్యం కోసం టోల్ ఫ్రీ నంబర్లను ఏర్పాటు చేశారు. వర్ష సంబంధిత అత్యవసర పరిస్థితుల కోసం 1800 425 3424, 9154225936, 18004251115 నంబర్లను కేటాయించారు. అలాగే, గ్రేటర్ వరంగల్ మున్సిపల్ కార్పొరేషన్ కార్యాలయంలో 1800 425 1980, 9701999676 నంబర్లను, విద్యుత్ సమస్యలకు 1800 425 0028 టోల్ ఫ్రీ నంబరును అధికారులు అందుబాటులోకి తెచ్చారు. భారీ వర్షం కారణంగా లోతట్టు ప్రాంతాల ప్రజలు అప్రమత్తంగా ఉండాలని అధికారులు కోరుతున్నారు.
