తెలంగాణలో అధికార కాంగ్రెస్ పార్టీ ఎమ్మెల్యేలు ప్రస్తుతం అధికార మదంతో, పెత్తందారీ ధోరణితో వ్యవహరిస్తున్నారని బీఆర్ఎస్ వర్కింగ్ ప్రెసిడెంట్ కేటీఆర్ తీవ్రస్థాయిలో విమర్శించారు. గ్రామ పంచాయతీలకు వచ్చే ప్రభుత్వ నిధులు మరియు ఇందిరమ్మ ఇళ్ల పథకం నేతల సొంత ఆస్తి కాదని, అవి ప్రజల సొమ్ము అని ఆయన స్పష్టం చేశారు. ఖానాపూర్, షాద్నగర్ నియోజకవర్గాలకు చెందిన నూతన సర్పంచులు, ఉప సర్పంచుల అభినందన సభలో మాట్లాడుతూ, కాంగ్రెస్ ఎమ్మెల్యేలు ప్రజాప్రతినిధులను చంపేస్తామంటూ బెదిరిస్తున్న తీరు ఆందోళన కలిగిస్తోందని కేటీఆర్ మండిపడ్డారు.
రైతులు ఎదుర్కొంటున్న యూరియా కొరతపై కేటీఆర్ స్పందిస్తూ, కేసీఆర్ హయాంలో ఇంటి వద్దకే రైతుబంధు, ఎరువులు లభించేవని, కానీ ఇప్పుడు బస్తా యూరియా కోసం రైతులు రోడ్లపై కొట్టుకోవాల్సిన దుస్థితి ఏర్పడిందని విమర్శించారు. అంతేకాక, యూరియా కోసం ఏర్పడుతున్న పొడవైన క్యూలను కప్పిపుచ్చుకునేందుకే ముఖ్యమంత్రి ‘యూరియా యాప్’ అనే డ్రామాకు తెరలేపారని ఆరోపించారు.
బీసీ రిజర్వేషన్ల తగ్గింపుపై కేటీఆర్ ముఖ్యమంత్రి రేవంత్ రెడ్డిపై ఘాటు విమర్శలు చేశారు. కేంద్ర ఆర్థిక సంఘం నుంచి రూ. 3,500 కోట్లు పొందేందుకే స్థానిక సంస్థల ఎన్నికల కోసం బీసీ రిజర్వేషన్లను 24 శాతం నుంచి 17 శాతానికి తగ్గించి, బీసీలను మోసం చేశారని ఆరోపించారు. చివరగా, ప్రస్తుత కాంగ్రెస్ ప్రభుత్వం మరో రెండు, రెండున్నరేళ్లలో కూలిపోవడం ఖాయమని, సర్పంచులు తమ పదవీకాలంలో చివరి రెండేళ్లు కేసీఆర్ నాయకత్వంలోనే పనిచేస్తారని కేటీఆర్ ధీమా వ్యక్తం చేశారు.
