సినిమా పైరసీ ప్రపంచంలో సంచలనం సృష్టించిన ‘ఐబొమ్మ’ (iBomma) వెబ్సైట్ నిర్వాహకుడు ఇమంది రవికి తెలంగాణ హైకోర్టులో ఊరట లభించింది. గత ఏడాది నవంబర్ నుండి జైలులో ఉన్న అతనికి న్యాయస్థానం మంగళవారం షరతులతో కూడిన బెయిల్ మంజూరు చేసింది. దాదాపు మూడు నెలల పాటు రిమాండ్లో ఉన్న రవి, తాజాగా బెయిల్ లభించడంతో త్వరలోనే చంచల్గూడ జైలు నుండి విడుదల కానున్నాడు.
అయితే, ఈ బెయిల్ మంజూరు చేస్తూ హైకోర్టు అత్యంత కఠినమైన షరతులను విధించింది. రవి ఎట్టి పరిస్థితుల్లోనూ దేశం విడిచి వెళ్లరాదని, తన పాస్పోర్టును వెంటనే కోర్టులో సరెండర్ చేయాలని ఆదేశించింది. అలాగే, ప్రతిరోజూ ఉదయం 11 గంటలకు హైదరాబాద్లోని సీసీఎస్ (CCS) పోలీసుల ఎదుట హాజరు కావాలని స్పష్టం చేసింది. కేసు విచారణకు పూర్తిస్థాయిలో సహకరించాలని న్యాయస్థానం అతన్ని ఆదేశించింది.
ముఖ్యంగా, రవి ఇంటర్నెట్ వినియోగంపై కోర్టు పూర్తిస్థాయిలో ఆంక్షలు విధించడం గమనార్హం. అతను ఎలాంటి ఇంటర్నెట్ సౌకర్యాన్ని సొంతంగా వాడకూడదని, ఒకవేళ అత్యవసర పరిస్థితుల్లో వినియోగించాల్సి వస్తే కచ్చితంగా పోలీసుల ముందస్తు అనుమతి తీసుకోవాలని ఉత్తర్వుల్లో పేర్కొంది. పైరసీ కార్యకలాపాలకు మళ్ళీ పాల్పడకుండా ఉండేందుకు కోర్టు ఈ విధమైన డిజిటల్ ఆంక్షలను విధించింది.
