తెలంగాణ ఉప ముఖ్యమంత్రి మల్లు భట్టి విక్రమార్క ఆంధ్రప్రదేశ్ పర్యటనలో భాగంగా ఏపీ శాసనసభ స్పీకర్ చింతకాయల అయ్యన్నపాత్రుడిని మర్యాదపూర్వకంగా కలిశారు. అమరావతిలోని అసెంబ్లీ కార్యాలయంలో జరిగిన ఈ భేటీలో భట్టితో పాటు తెలంగాణ ఐటీ శాఖ మంత్రి దుద్దిళ్ల శ్రీధర్ బాబు కూడా ఉన్నారు. మార్చి 5వ తేదీన హైదరాబాద్లో జరగనున్న తన కుమారుడు సూర్య విక్రమాదిత్య వివాహ వేడుకకు రావాల్సిందిగా స్పీకర్కు ఆహ్వాన పత్రికను అందించి, సాదరంగా ఆహ్వానించారు.
ఈ సందర్భంగా ఇరు రాష్ట్రాల నేతలు కాసేపు ఆత్మీయంగా ముచ్చటించుకున్నారు. తెలుగు రాష్ట్రాల మధ్య సోదరభావం, రాజకీయ పరిణామాలు మరియు ఉమ్మడి అంశాలపై వారి మధ్య చర్చ జరిగినట్లు తెలుస్తోంది. అంతకుముందే భట్టి విక్రమార్క ఏపీ ముఖ్యమంత్రి నారా చంద్రబాబు నాయుడిని కూడా కలిసి వివాహ ఆహ్వాన పత్రికను అందజేశారు. వరుస భేటీలతో ఏపీ రాజధాని ప్రాంతంలో తెలంగాణ మంత్రుల పర్యటన ఆసక్తికరంగా సాగింది.
అమరావతి పర్యటనకు ముందు భట్టి విక్రమార్క విజయవాడ ఇంద్రకీలాద్రిపై కొలువుదీరిన కనకదుర్గమ్మను దర్శించుకున్నారు. ఆలయ అధికారులు, అర్చకులు ఆయనకు ఘనస్వాగతం పలికి ప్రత్యేక పూజలు నిర్వహించారు. దర్శనం అనంతరం పండితులు వేదాశీర్వచనం అందజేయగా, అధికారులు అమ్మవారి ప్రసాదం మరియు చిత్రపటాన్ని బహూకరించారు. తన కుమారుడి వివాహం నిర్విఘ్నంగా జరగాలని, రెండు రాష్ట్రాల ప్రజలు సుఖసంతోషాలతో ఉండాలని అమ్మవారిని ప్రార్థించినట్లు భట్టి విక్రమార్క తెలిపారు.
