ప్రధాన ఎన్నికల కమిషనర్ (సీఈసీ) జ్ఞానేశ్ కుమార్పై క్రిమినల్ ప్రాసిక్యూషన్ ప్రారంభించాలని కోరుతూ సుప్రీంకోర్టులో పిటిషన్ దాఖలైంది. ఓటర్ల జాబితా ప్రత్యేక సవరణ (సర్) ప్రక్రియలో ఆయన తీసుకున్న పలు నిర్ణయాలు చట్టవిరుద్ధమని ఆరోపిస్తూ అడ్వకేట్ శైలేంద్ర మణి త్రిపాఠి ఈ వ్యాజ్యాన్ని దాఖలు చేశారు. రాజ్యాంగంలోని ఆర్టికల్ 32 కింద ఈ ప్రజా ప్రయోజన వ్యాజ్యాన్ని విచారణకు స్వీకరించాలని ఆయన కోరారు.
పిటిషన్లోని ప్రధాన డిమాండ్ల ప్రకారం, ఇతర ఇద్దరు ఎన్నికల కమిషనర్లు సుఖ్బీర్ సింగ్ సంధు, వివేక్ జోషిల అంగీకారం లేకుండా సీఈసీ జ్ఞానేశ్ కుమార్ జారీ చేసిన మార్గదర్శకాలు, ఆదేశాలు, సాఫ్ట్వేర్ మార్పులను రాజ్యాంగ విరుద్ధమని ప్రకటించాలి. ఓటరు నమోదుకు ఉపయోగించే ఫారం-6లో చేసిన మార్పులను రద్దు చేసి, పాత విధానాన్ని పునరుద్ధరించాలని కోరారు. దాదాపు 30 రాష్ట్రాలు-కేంద్ర పాలిత ప్రాంతాల్లో సుమారు 13 కోట్ల ఓట్లను తొలగించారన్న ఆరోపణలపై ప్రత్యేక దర్యాప్తు బృందం (సిట్) లేదా సుప్రీంకోర్టు రిటైర్డ్ న్యాయమూర్తితో విచారణ జరిపించాలని పిటిషన్లో అభ్యర్థించారు.
సీఈసీ జ్ఞానేశ్ కుమార్తో పాటు సీనియర్ డిప్యూటీ ఎలక్షన్ కమిషనర్ మనీశ్ గార్గ్, ఈసీ ఐటీ విభాగం అధిపతి సీమా ఖన్నా తదితరులపై ప్రజాప్రాతినిధ్య చట్టం-1950లోని సెక్షన్ 32 కింద క్రిమినల్ చర్యలు తీసుకోవాలని పిటిషనర్ డిమాండ్ చేశారు. గత 10 నెలల్లో ఎన్నికల కమిషన్లోని ఇతర ఇద్దరు కమిషనర్లు దాదాపు 14 సందర్భాల్లో పలు కీలక నిర్ణయాలపై లిఖితపూర్వకంగా తమ అసమ్మతిని వ్యక్తం చేశారని వెలువడిన మీడియా కథనాలను పిటిషన్లో ఉటంకించారు.
ఓటర్ల జాబితా సవరణ ప్రక్రియలో అక్రమాలు జరిగాయని, అధికార పార్టీకి లబ్ధి చేకూర్చేలా భారీ సంఖ్యలో ఓటర్లను తొలగించారని కాంగ్రెస్ సహా ప్రతిపక్షాలు గతంలోనే ఆరోపించాయి. అయితే, కమిషనర్ల మధ్య అభిప్రాయ భేదాలు సహజమేని, తుది నిర్ణయాలు మాత్రం ఏకాభిప్రాయంతోనే తీసుకున్నామని ఎన్నికల కమిషన్ గతంలో వివరణ ఇచ్చింది. ప్రస్తుతం ఈ పిటిషన్ దాఖలు దశలో ఉండగా, సుప్రీంకోర్టు దీనిపై ఇకా విచారణ చేపట్టాల్సి ఉంది.
