తెలంగాణ రాష్ట్రంలో కీలకమైన రైల్వే ప్రాజెక్టులు ఆలస్యం కావడానికి ప్రధాన కారణాలను కేంద్ర రైల్వే మంత్రి అశ్వినీ వైష్ణవ్ లోక్సభలో స్పష్టం చేశారు. భూసేకరణలో జాప్యం, అలాగే నిధుల వాటా చెల్లింపులో రాష్ట్ర ప్రభుత్వం భాగస్వామ్యం లేకపోవడమే ఈ ఆలస్యానికి ముఖ్య కారణాలని నిజామాబాద్ ఎంపీ ధర్మపురి అర్వింద్ అడిగిన ప్రశ్నకు సమాధానంగా ఆయన వెల్లడించారు. మొత్తం 2,343 హెక్టార్ల భూమి అవసరం కాగా, ఇప్పటివరకు కేవలం 1,580 హెక్టార్లు మాత్రమే సేకరించారని, మరో 763 హెక్టార్ల భూమిని ఇంకా సేకరించాల్సి ఉందని మంత్రి పేర్కొన్నారు.
పలు ముఖ్యమైన డబ్లింగ్ మరియు కొత్త లైన్ ప్రాజెక్టులు కాస్ట్ షేరింగ్ (నిధుల భాగస్వామ్యం) పద్ధతిలో మంజూరయ్యాయని, అయితే ఈ నిధుల చెల్లింపులో రాష్ట్ర ప్రభుత్వం నుంచి తీవ్ర జాప్యం జరుగుతోందని మంత్రి తెలిపారు. రూ.4,704 కోట్ల విలువైన నాలుగు ప్రాజెక్టులలో తెలంగాణ వాటాగా రూ.2,181 కోట్లు చెల్లించాల్సి ఉంది. ఇప్పటివరకు రాష్ట్రం రూ.1,708 కోట్లు డిపాజిట్ చేయాల్సి ఉండగా, కేవలం రూ.894 కోట్లు మాత్రమే చెల్లించిందని, ఇంకా రూ.814 కోట్లు రాష్ట్రం నుంచి కేంద్రానికి అందాల్సి ఉందని ఆయన లోక్సభకు వివరించారు.
మనోహరాబాద్–కొత్తపల్లి కొత్త లైన్ ప్రాజెక్టుకు సంబంధించిన భూమిని రాష్ట్ర ప్రభుత్వం ఉచితంగా ఇవ్వాల్సి ఉన్నప్పటికీ, ఇందులో కూడా జాప్యం జరుగుతోంది. ముఖ్యంగా, మనోహరాబాద్–సిద్ధిపేటల మధ్య 76 కిలోమీటర్ల లైన్ ప్రారంభమైనప్పటికీ, సిద్ధిపేట–సిరిసిల్ల (31 కి.మీ) సెక్షన్ పనులు నిధులు లేక నిలిచిపోయాయి. ఈ సెక్షన్ పనుల కొనసాగింపు కోసం రాష్ట్రం కోరిన రూ.10.10 కోట్లు ఇప్పటివరకు డిపాజిట్ చేయలేదని మంత్రి తెలిపారు. భూసేకరణ మరియు నిధుల వాటాలో రాష్ట్ర ప్రభుత్వం నుంచి సహకారం లభిస్తేనే ఈ ప్రాజెక్టులను త్వరగా పూర్తి చేయగలుగుతామని రైల్వే మంత్రి స్పష్టం చేశారు.
