ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత పవన్ కల్యాణ్, తిరుమల పరకామణి చోరీ కేసును మాజీ ముఖ్యమంత్రి జగన్మోహన్ రెడ్డి చిన్నదిగా అభివర్ణించడాన్ని తీవ్రంగా తప్పుబట్టారు. అమరావతిలో మీడియాతో మాట్లాడిన పవన్ కల్యాణ్, జగన్ చేసిన వ్యాఖ్యలను విమర్శిస్తూ, “తన మతంలో ఇలా జరిగితే ఊరుకుంటారా?” అని సూటిగా ప్రశ్నించారు. భారత రాజ్యాంగం అన్ని మతాలకూ ఒకేలా వర్తిస్తుందని, ధర్మం, రాజ్యాంగం ఒకే దిశలో మార్గదర్శకాలుగా పనిచేయాలని ఆయన స్పష్టం చేశారు.
పవన్ కల్యాణ్ మాట్లాడుతూ, ఇస్లాం, క్రైస్తవ మతాలకు ఒకలా, హిందూ మతానికి మరోలా నిబంధనలు ఉండకూడదని స్పష్టం చేశారు. హిందువులు మెజారిటీ అనేది ఒక భ్రమ అని, కులం, మతం, భాష, ప్రాంతాల వారీగా వారు విడిపోయి ఉన్నారని పేర్కొన్నారు. సనాతన ధర్మ రక్షణ దేశంలోని ప్రతి హిందువు బాధ్యత అని ఆయన పిలుపునిచ్చారు. అలాగే, తమిళనాడులోని తిరుప్పరంకుండ్రం మురుగన్ ఆలయంలో దీపావళి దీపోత్సవ కార్యక్రమానికి హైకోర్టులో విజయం సాధించినా, పోలీసులు అనుమతి ఇవ్వకపోవడాన్ని ఆయన ప్రశ్నించారు. హిందువులు తమ ఆచారాలు పాటించడానికి కోర్టులకు వెళ్లాల్సి రావడం దుర్భరం అన్నారు.
ఈ నేపథ్యంలో, భక్తులు తమ ఆలయాలు, మతపరమైన కార్యక్రమాలను స్వయంగా నిర్వహించుకునేలా సనాతన ధర్మ రక్ష బోర్డు ఏర్పాటు చేయాలని పవన్ కల్యాణ్ ప్రతిపాదించారు. అంతేకాకుండా, తమిళనాడులోని అధికార పార్టీ డీఎంకే సూడో సెక్యూలిజంను పాటిస్తోందని ఆయన విమర్శించారు. హిందూ సమాజ హక్కును కాపాడేలా ఒక న్యాయమూర్తి తీర్పు ఇస్తే, డీఎంకే నేతృత్వంలో 120 మంది ఎంపీలు ఆయనపై అభిశంసన పిటిషన్ ఇచ్చారని గుర్తు చేశారు. శబరిమల విషయంలో న్యాయపరంగా ఎదుర్కొన్నారే కానీ, ఇలా అభిశంసన తీర్మానాలు చేయలేదని పవన్ కల్యాణ్ వ్యాఖ్యానించారు.
