తెలంగాణ పంచాయతీ ఎన్నికల్లో భాగంగా జయశంకర్ భూపాలపల్లి జిల్లాలోని కాళేశ్వరం మేజర్ గ్రామ పంచాయతీలో బీఆర్ఎస్ మద్దతుదారుడు ఘన విజయం సాధించారు. బీఆర్ఎస్ బలపరిచిన అభ్యర్థి వెన్నపురెడ్డి మోహన్ రెడ్డి తన ప్రత్యర్థిపై వెయ్యికి పైగా ఓట్ల భారీ మెజార్టీతో సర్పంచ్గా గెలుపొందారు. కాళేశ్వరం ప్రాజెక్టుపై గత కొంతకాలంగా రాజకీయంగా అనేక ఆరోపణలు, విమర్శలు వినిపిస్తున్న నేపథ్యంలో, ఈ విజయం రాజకీయ వర్గాల్లో ఆసక్తికరంగా మారింది.
కాళేశ్వరం ప్రాజెక్టు నిర్మాణంలో అవినీతి జరిగిందంటూ కాంగ్రెస్ ప్రభుత్వం చేస్తున్న ఆరోపణల వల్ల ఆ ప్రాంత ప్రజల్లో బీఆర్ఎస్పై వ్యతిరేకత ఉందనే వాదనలు వినిపించాయి. అయితే, ఈ ఎన్నికల ఫలితాలు ఆ వాదనలకు భిన్నంగా వెలువడ్డాయి. ప్రాజెక్టు పరిధిలోని కీలకమైన గ్రామంలో ప్రజలు బీఆర్ఎస్ మద్దతుదారుడికే పట్టం కట్టడం విశేషం. ఈ ఫలితం ద్వారా స్థానికంగా పార్టీకి ఉన్న పట్టు చెక్కుచెదరలేదని బీఆర్ఎస్ శ్రేణులు అభిప్రాయపడుతున్నాయి.
కేవలం కాళేశ్వరం గ్రామమే కాకుండా, మహదేవ్పూర్ మండలంలో మరికొన్ని చోట్ల కూడా బీఆర్ఎస్ తన ఆధిపత్యాన్ని చాటుకుంది. అన్నారం, బ్రాహ్మణపల్లి వంటి గ్రామాల్లో కూడా బీఆర్ఎస్ మద్దతుదారులు సర్పంచ్లుగా విజయం సాధించారు. ఈ విజయాలతో మహదేవ్పూర్ మండలంలో గులాబీ శ్రేణులు సంబరాలు జరుపుకుంటున్నాయి. ప్రాజెక్టు పరిసర ప్రాంతాల్లో బీఆర్ఎస్ అభ్యర్థులు వరుస విజయాలు నమోదు చేయడం చర్చనీయాంశంగా మారింది.
