మంచిర్యాల జిల్లా చెన్నూరు పట్టణంలో బుధవారం కురిసిన భారీ వర్షం ఓ అరుదైన దృశ్యాన్ని ఆవిష్కరించింది. వర్షపు నీటితో పాటు చిన్నపాటి చేపలు వీధుల్లోకి కొట్టుకురావడంతో స్థానికులు ఆశ్చర్యానికి లోనయ్యారు. రోడ్లపై కనిపిస్తున్న ఆ చేపలను పట్టుకోవడానికి పిల్లలు, యువకులు పోటీపడ్డారు.
పట్టణంలోని పుప్పాల హనుమాన్ వీధిలో ఈ వింత ఘటన చోటుచేసుకుంది. కుండపోత వర్షం కారణంగా వీధులన్నీ జలమయమయ్యాయి. ఈ క్రమంలో వరద నీటిలో చేపలు కొట్టుకురావడం స్థానికులను విస్మయానికి గురిచేసింది. కొందరు ఇవి ఆకాశం నుండి పడ్డాయని భావించినప్పటికీ, ఈ చేపలు అసలు ఎక్కడి నుండి వచ్చాయనే అంశంపై స్థానికంగా పెద్ద ఎత్తున చర్చ జరుగుతోంది. చిన్నారులు, యువకులు ఉత్సాహంగా ఈ చేపలను పట్టుకున్నారు. దీనికి సంబంధించిన దృశ్యాలను కొందరు వీడియో తీసి సోషల్ మీడియాలో పోస్ట్ చేయడంతో అవి కాస్తా వైరల్ అయ్యాయి.
ప్రస్తుతం తెలంగాణ వ్యాప్తంగా రుతుపవనాలు చురుగ్గా కదులుతుండటంతో పలు జిల్లాల్లో భారీ వర్షాలు కురుస్తున్నాయి. ఎడతెరిపి లేకుండా కురుస్తున్న ఈ వానలకు చెరువులు, కుంటలు వంటి జలాశయాలు నిండి పొంగిపొర్లుతున్నాయి. ఈ క్రమంలోనే సమీపంలోని నీటి వనరుల నుంచి చేపలు వరద నీటితో పాటు జనావాసాల్లోకి కొట్టుకొచ్చి ఉంటాయని భావిస్తున్నారు.
