ఆసియాలో వేగంగా అభివృద్ధి చెందుతున్న ఆర్థిక వ్యవస్థల్లో భారత్ తన స్థానాన్ని మరింత బలోపేతం చేసుకుంటోంది. దీనికి నిదర్శనంగా ఫోర్బ్స్ ఆసియా విడుదల చేసిన ప్రతిష్టాత్మక ‘బెస్ట్ అండర్ ఎ బిలియన్ 2026’ జాబితా నిలిచింది. ఆసియా-పసిఫిక్ ప్రాంతంలోని అత్యుత్తమ చిన్న, మధ్య తరహా పబ్లిక్ లిస్టెడ్ కంపెనీల్లో ఎంపికైన 200 సంస్థల జాబితాలో 27 భారతీయ కంపెనీలు చోటు దక్కించుకున్నాయి.
ఈ జాబితాలో 28 కంపెనీలతో చైనా మొదటి స్థానంలో నిలవగా, ఒక్క కంపెనీ తేడాతో భారత్ రెండో స్థానాన్ని సాధించింది. ఆసియా మార్కెట్లలో భారత కంపెనీలు తమ ఆర్థిక సామర్థ్యం, వ్యాపార వృద్ధి, స్థిరమైన పనితీరుతో అంతర్జాతీయ స్థాయిలో గుర్తింపు పొందుతున్నాయి.
ప్రపంచవ్యాప్తంగా భౌగోళిక ఉద్రిక్తతలు, సరఫరా వ్యవస్థ సమస్యలు, ఇంధన మార్కెట్లలో అనిశ్చితి వంటి సవాళ్లు ఉన్నప్పటికీ భారత కంపెనీలు బలమైన ఆదాయ వృద్ధి, మెరుగైన లాభదాయకతను కొనసాగించాయి. ఈ కారణంగానే ఫోర్బ్స్ ఎంపిక చేసిన అత్యుత్తమ సంస్థల జాబితాలో భారత కంపెనీల ప్రాతినిధ్యం గణనీయంగా పెరిగింది.
