ఆంధ్రప్రదేశ్ ఐటీ శాఖ మంత్రి నారా లోకేష్ తన యుఎస్ పర్యటనలో భాగంగా సాన్ఫ్రాన్సిస్కోలో పలు టెక్ దిగ్గజాల ప్రతినిధులతో కీలక చర్చలు నిర్వహించారు. ఈ సందర్భంగా ఆయన గూగుల్ సీఈఓ సుందర్ పిచాయ్తో భేటీ అయ్యి, విశాఖపట్నంలో ఏర్పాటు అవుతున్న గూగుల్ ఏఐ డేటా సెంటర్ పనుల పురోగతిని సమీక్షించారు. ముఖ్యమంత్రి చంద్రబాబు నాయుడు దృష్టిలో ప్రతి కుటుంబంలో ఒక ఏఐ నైపుణ్యవంతుడు ఉండాలని లోకేష్ ఈ సందర్భంగా తెలిపారు. గూగుల్ పెట్టుబడి మొదటి దశ మాత్రమేనని, మార్చి నెలలో డేటా సెంటర్కు పునాది రాయి పెట్టే కార్యక్రమం ఉంటుందని లోకేష్ ప్రకటించారు. అదనంగా, డ్రోన్ సిటీలో గూగుల్ అసెంబ్లింగ్ యూనిట్ను ఏర్పాటు చేయాలని ఆయన కోరారు.
మంత్రి లోకేష్ ఈ పర్యటనలో రాష్ట్రంలో టెక్ కేంద్రాల ఏర్పాటుకు పలు కంపెనీలకు విజ్ఞప్తి చేశారు. జెడ్ స్కాలర్స్ సీఈవో జే చౌదరితో భేటీలో విశాఖపట్నంలో సైబర్ సెక్యూరిటీ కోసం ఆర్ అండ్ డి సెంటర్, డెవలప్మెంట్ సెంటర్లను ఏర్పాటు చేయాలని కోరారు. అలాగే, ఇంటెల్ ఐటీ సీటీఓ షేష్ కృష్ణపురతో చర్చలు జరిపి, రాష్ట్రంలో ఇంటెల్ ఏటీఎంపీ యూనిట్ను ప్రారంభించాలని, అమరావతిలో ఇంటెల్ ఏఐ రీసెర్చ్ సెంటర్ను పరిశీలించాలని సూచించారు. ఎన్విడియా ప్రతినిధి రాజ్మిర్ పూరితో మాట్లాడి, ఆంధ్రప్రదేశ్లో ఎన్విడియా స్మార్ట్ ఫ్యాక్టరీ పైలట్ ప్రాజెక్ట్ను ముందుపెట్టాలని, తమ భాగస్వామి కంపెనీల పెట్టుబడులకు సహకారం అందిస్తామని లోకేష్ హామీ ఇచ్చారు. ఈ ప్రతినిధులు ప్రతిపాదనలను పరిశీలిస్తామని లోకేష్కు హామీ ఇచ్చారు.
ఇక ఇతర టెక్ దిగ్గజాలతో చర్చల్లో, అడోబ్ సీఈవో శంతాను నారాయణ్తో భేటీ అయి, రాష్ట్రంలో అడోబ్ జీసీసీ సెంటర్ను (గ్లోబల్ కెపాసిటీ సెంటర్) ఏర్పాటు చేయాలని లోకేష్ కోరారు. జూమ్ ప్రెసిడెంట్ శంకర్ లింగంతో చర్చించి, ఆంధ్రప్రదేశ్లో జూమ్ డెవలప్మెంట్ సెంటర్ను ప్రారంభించాలని ప్రతిపాదించారు. అలాగే, కాన్వా సీసీఈవో రాబ్ గిగిలియోతో భేటీలో అమరావతి క్రియేటర్ ల్యాండ్ ప్రాజెక్టులో శిక్షణ, నైపుణ్యాల అభివృద్ధికి క్రియేటివ్ ప్రోగ్రామ్లు అమలు చేయాలని మంత్రి లోకేష్ సూచించారు. ఈ చర్చలు రాష్ట్రంలో ఐటీ, ఏఐ రంగాల్లో పెట్టుబడులను ఆకర్షించి, ఉపాధి అవకాశాలను పెంచుతాయని లోకేష్ ఆశాభావం వ్యక్తం చేశారు.
