ఢిల్లీ పర్యటనలో ఉన్న ఆంధ్రప్రదేశ్ మంత్రి నారా లోకేష్ తాజాగా చేసిన ట్వీట్ సోషల్ మీడియాలో వైరల్ అవుతోంది. గతంలో పెట్టుబడుల సమ్మిట్ సందర్భంగా సర్ప్రైజ్ ట్వీట్లు చేసిన లోకేష్, మరోసారి “విశాఖకు ప్రపంచ చాంపియన్ షిప్ సాధించిన టీమ్ రాబోతోందని.. వారు ఎవరో ఊహించండి” అంటూ క్విజ్ విసిరారు. ఈ ట్వీట్ వెనుక ఉన్న సీక్రెట్ను కనిపెట్టేందుకు నెటిజన్లు ఆసక్తిగా చర్చించుకుంటున్నారు.
చాలా మంది నెటిజన్లు లోకేష్ క్విజ్ను సులువుగా గుర్తించారు. ఇటీవల వన్డే ప్రపంచకప్ గెలిచిన భారత మహిళల క్రికెట్ జట్టు రాక గురించే మంత్రి ట్వీట్ చేశారని ఎక్కువ మంది అంచనా వేశారు. భారత్, శ్రీలంక మహిళా జట్ల మధ్య రెండు టీ20 మ్యాచ్లు ఈ నెల 21 మరియు 23వ తేదీలలో విశాఖ స్టేడియంలో జరగనున్నాయి. అందుకోసం హర్మన్ప్రీత్ కౌర్ నేతృత్వంలోని భారత జట్టు విశాఖకు రానుంది.
అయితే, కొంత మంది నెటిజన్లు ఫుట్బాల్ స్టార్ మెస్సీ తరహాలో మరో అంతర్జాతీయ క్రీడా ప్రముఖులు ఎవరైనా వస్తున్నారా అని కూడా ఆరా తీస్తున్నారు. గతంలో ఫుట్బాల్ స్టార్ బెక్ హామ్ విశాఖలో పర్యటించిన విషయాన్ని గుర్తు చేసుకున్నారు. అయినప్పటికీ, లోకేష్ అసలు విషయం ప్రకటించే వరకూ, ఈ నెలలో విశాఖకు వచ్చే ప్రపంచ చాంపియన్లు ఎవరనేది అధికారికంగా సస్పెన్స్గానే ఉండే అవకాశం ఉంది.
