ప్రస్తుతం విశాఖపట్నం విమానాశ్రయం నగరం లోపలే ఉంది, అయితే ఇది జూన్ లేదా జూలై నెలల్లో భోగాపురానికి మారనుంది. భోగాపురం ఎయిర్పోర్టు నగరం నుండి సుమారు 45-50 కిలోమీటర్ల దూరంలో ఉండటంతో, ప్రయాణికులకు ప్రత్యామ్నాయ రవాణా మార్గంగా రైల్వే సేవలను బలోపేతం చేయాలని ఎమ్మెల్యే కోరారు. విశాఖ నుంచి విజయవాడ, తిరుపతి, చెన్నై, హైదరాబాద్ మరియు బెంగళూరు వంటి నగరాలకు అదనపు వందే భారత్ ఎక్స్ప్రెస్లను కేటాయించాలని ఆయన తన లేఖలో విన్నవించారు.
భోగాపురం ఎయిర్పోర్టుకు వెళ్లేందుకు సరైన అంతర్గత రహదారులు మరియు రవాణా సౌకర్యాలు పూర్తి కాకుండా విమానాశ్రయాన్ని ప్రారంభించడం వల్ల ప్రయాణికులు ఇబ్బంది పడతారని విష్ణుకుమార్ రాజు అభిప్రాయపడ్డారు. ఈ క్రమంలోనే ఆయన గతంలో సెటైర్లు వేస్తూ.. భోగాపురం వెళ్లి విమానం ఎక్కడం కంటే వందే భారత్ రైలులో విజయవాడ చేరుకోవడం సులభమని వ్యాఖ్యానించారు. విశాఖ-విజయవాడ సెక్టార్లో పెరగనున్న రద్దీని దృష్టిలో ఉంచుకుని కనీసం రెండు అదనపు రైళ్లను ఏర్పాటు చేయాలని కోరారు.
ప్రస్తుతం విశాఖపట్నం నుంచి సికింద్రాబాద్, దుర్గ్, మరియు తిరుపతి వంటి ప్రాంతాలకు వందే భారత్ సేవలు అందుబాటులో ఉన్నాయి. ఒకవేళ కేంద్రం ఈ కొత్త ప్రతిపాదనలకు గ్రీన్ సిగ్నల్ ఇస్తే, విశాఖపట్నం ఆంధ్రప్రదేశ్ యొక్క అతిపెద్ద వందే భారత్ రైల్వే హబ్గా మారే అవకాశం ఉంది. ఇది కేవలం పర్యాటక రంగమే కాకుండా, పారిశ్రామికంగా అభివృద్ధి చెందుతున్న విశాఖకు మరింత ఊతమిస్తుందని ఆర్థిక విశ్లేషకులు భావిస్తున్నారు.
