అంచనాలపై కేటీఆర్ నిజాయితీ
మున్సిపల్ ఎన్నికల ఫలితాలపై స్పందిస్తూ, బీఆర్ఎస్ కనీసం 30కి పైగా మున్సిపాలిటీలను కైవసం చేసుకుంటుందని తాము అంచనా వేశామని కేటీఆర్ అంగీకరించారు. అయితే, తుది ఫలితాల్లో ఆ సంఖ్య ఆశించిన దానికంటే కొంత మేర తగ్గిందని ఆయన పేర్కొన్నారు. అధికార పార్టీ అడ్డంకులు, అధికార యంత్రాంగం దుర్వినియోగం వంటి అంశాలు ఫలితాలపై ప్రభావం చూపాయని ఆరోపించారు. అయినప్పటికీ, ప్రధాన ప్రతిపక్షంగా బీఆర్ఎస్ తన పట్టును నిరూపించుకుందని ధీమా వ్యక్తం చేశారు.
కాంగ్రెస్, బీజేపీలపై సెటైర్లు
అధికార కాంగ్రెస్ పార్టీకి కూడా ప్రజలు ఆశించిన స్థాయిలో మద్దతు ఇవ్వలేదని కేటీఆర్ విమర్శించారు. “కాంగ్రెస్ గాలిలో మేడలు కట్టింది, కానీ క్షేత్రస్థాయిలో వాస్తవాలు వేరేలా ఉన్నాయి” అని ఎద్దేవా చేశారు. రాష్ట్రవ్యాప్తంగా కాంగ్రెస్ ప్రభావం తగ్గిందని, కేవలం అధికార బలంతోనే కొన్ని చోట్ల నెట్టుకొచ్చిందని విమర్శించారు. ఇక బీజేపీ గురించి మాట్లాడుతూ.. కరీంనగర్, నిజామాబాద్ వంటి ఒకటి రెండు ప్రాంతాల్లో మినహా, ఆ పార్టీ ప్రభావం రాష్ట్రవ్యాప్తంగా శూన్యమని సెటైర్లు వేశారు.
హంగ్ మున్సిపాలిటీలపై ఫోకస్
మున్సిపల్ ఫలితాల్లో 30కి పైగా చోట్ల హంగ్ ఏర్పడటంతో, అక్కడ పీఠాలను దక్కించుకోవడంపై కేటీఆర్ వ్యూహాత్మకంగా వ్యవహరిస్తున్నారు. హంగ్ వచ్చిన ప్రాంతాల్లో పరిస్థితి బీఆర్ఎస్కు అనుకూలంగా ఉందని, ఎక్స్ అఫీషియో ఓట్ల ద్వారా తమ పార్టీ పట్టు సాధిస్తుందని వెల్లడించారు. ఈ విషయంలో ఇప్పటికే ఎన్నికల సంఘం అధికారులతో చర్చించామని, తమ అభ్యర్థులను కాపాడుకుంటూనే మున్సిపల్ చైర్మన్ పీఠాలను కైవసం చేసుకునేందుకు ప్రయత్నిస్తామని ధీమా వ్యక్తం చేశారు.
