మెగాస్టార్ చిరంజీవి నటించిన ‘మన శంకర వరప్రసాద్ గారు’ చిత్రం సంక్రాంతి కానుకగా జనవరి 12న విడుదలవుతున్న నేపథ్యంలో, తెలంగాణ ప్రభుత్వం టికెట్ ధరలను పెంచుకునేందుకు అనుమతి ఇచ్చింది. అయితే, ఈ ధరల పెంపు నిబంధనలకు విరుద్ధంగా ఉందంటూ న్యాయవాది విజయ్ గోపాల్ తెలంగాణ హైకోర్టులో ‘హౌస్ మోషన్’ పిటిషన్ దాఖలు చేశారు. ప్రభుత్వం ఏకపక్షంగా ధరలను పెంచి సామాన్య ప్రేక్షకుడిపై భారం మోపుతోందని ఆయన తన పిటిషన్లో పేర్కొన్నారు.
ఈ పిటిషన్పై అత్యవసర విచారణ జరపాలని న్యాయవాది కోరగా, హైకోర్టు అందుకు నిరాకరించింది. ప్రస్తుతానికి హౌస్ మోషన్ విచారణ అవసరం లేదని భావించిన కోర్టు, కేవలం పని దినాల్లో మాత్రమే ఇటువంటి పిటిషన్లను దాఖలు చేయాలని స్పష్టం చేసింది. దీంతో కోర్టు సెలవుల అనంతరం, అంటే ఈ నెల 19వ తేదీన మరోసారి రెగ్యులర్ పిటిషన్ దాఖలు చేసేందుకు పిటిషనర్ సిద్ధమవుతున్నారు. ఈలోగా ప్రభుత్వం ఇచ్చిన ఉత్తర్వుల ప్రకారమే టికెట్ల విక్రయాలు కొనసాగే అవకాశం ఉంది.
ప్రభుత్వ ఉత్తర్వుల ప్రకారం, జనవరి 11న నిర్వహించే స్పెషల్ ప్రీమియర్ షో టికెట్ ధరను రూ. 600గా నిర్ణయించారు. అలాగే జనవరి 12 నుంచి వారం రోజుల పాటు సింగిల్ స్క్రీన్లలో రూ. 50, మల్టీప్లెక్స్లలో రూ. 100 అదనంగా పెంచుకునే వెసులుబాటు కల్పించారు. ఇప్పటికే ప్రభాస్ నటించిన ‘ది రాజా సాబ్’ సినిమా ధరల పెంపు విషయంలో కూడా హైకోర్టులో వివాదం నెలకొన్న నేపథ్యంలో, చిరంజీవి సినిమా టికెట్ ధరల వ్యవహారంపై కోర్టు 19న ఎలాంటి నిర్ణయం తీసుకుంటుందోనని సినీ వర్గాల్లో ఆసక్తి నెలకొంది.
