మృణాల్ ఠాకూర్ తన కొత్త చిత్రం ‘దో దీవానే షెహర్ మే’ ప్రమోషన్లలో భాగంగా ఆసక్తికర వ్యాఖ్యలు చేశారు. ప్రస్తుత డిజిటల్ యుగంలో బంధాలు చాలా సులభంగా విచ్ఛిన్నమవుతున్నాయని ఆమె ఆవేదన వ్యక్తం చేశారు. చిన్నపాటి గొడవలు రాగానే ఒకరినొకరు సోషల్ మీడియాలో బ్లాక్ చేసుకోవడం, “మా దారులు వేరు” అని సులభంగా విడిపోవడం సరైన పద్ధతి కాదని ఆమె పేర్కొన్నారు. పాతకాలపు మనస్తత్వంతో ఒకరినొకరు అర్థం చేసుకుని ముందుకు సాగితే బంధం బలంగా ఉంటుందని సూచించారు.
ప్రేమపై ఎవరూ నమ్మకం కోల్పోవద్దని, సరైన వ్యక్తి మీ జీవితంలోకి వచ్చినప్పుడు ప్రపంచం చాలా అందంగా మారుతుందని మృణాల్ అన్నారు. “సరైన వ్యక్తి కోసం ఓపికగా ఎదురుచూడండి. అంతేకానీ తొందరపడి ఎలాంటి తప్పుడు నిర్ణయాలు తీసుకోవద్దు” అని యువతకు ఆమె సలహా ఇచ్చారు. ప్రేమ అనేది కేవలం ఒక ఆకర్షణ కాదని, అది జీవితాన్ని సులభతరం చేసే ఒక శక్తి అని ఆమె వివరించారు.
ఇక మృణాల్ నటించిన ‘దో దీవానే షెహర్ మే’ చిత్రం ఫిబ్రవరి 20న విడుదల కానుంది. సిద్ధాంత్ చతుర్వేది హీరోగా నటిస్తున్న ఈ సినిమాను సంజయ్ లీలా భన్సాలీ మరియు జీ స్టూడియోస్ సంయుక్తంగా నిర్మించాయి. ఈ చిత్రంలో కూడా ప్రేమలో ఉండే సంఘర్షణలు మరియు లోతును చూపించబోతున్నారు. తెలుగులో క్రేజీ ప్రాజెక్టులతో బిజీగా ఉన్న ఈ భామ, ఈ బాలీవుడ్ చిత్రంతో కూడా విజయాన్ని అందుకుంటానని ధీమా వ్యక్తం చేస్తున్నారు.
