చైనా అధికారులు భారతీయుల పట్ల వ్యవహరిస్తున్న తీరు మరోసారి వివాదాస్పదమైంది. అరుణాచల్ ప్రదేశ్ అంశంపై గతంలో మాట్లాడినందుకు గాను, భారత ట్రావెల్ వ్లాగర్ అనంత్ మిత్తల్ను చైనాలోని గ్వాంగ్జౌ విమానాశ్రయంలో అధికారులు గంటల తరబడి నిర్బంధించారు. ‘ఆన్ రోడ్ ఇండియా’ పేరుతో ట్రావెల్ వీడియోలు చేసే అనంత్, ఈ నెల 16న తనకు ఎదురైన భయానక అనుభవాన్ని సోషల్ మీడియా వేదికగా పంచుకున్నారు. ఇమిగ్రేషన్ సమయంలో తనను పక్కకు తీసుకెళ్లి, దాదాపు 15 గంటల పాటు విచారణ పేరుతో వేధించారని ఆయన ఆరోపించారు.
నిర్బంధం సమయంలో చైనా అధికారులు అనంత్ ఫోన్, కెమెరాలను స్వాధీనం చేసుకుని, కనీసం ఆహారం కూడా ఇవ్వకుండా ఇబ్బందులకు గురిచేశారని తెలుస్తోంది. భారత రాయబార కార్యాలయ అధికారులతో మాట్లాడేందుకు కూడా అనుమతించలేదని ఆయన వాపోయారు. గతంలో అరుణాచల్ ప్రదేశ్కు చెందిన ఒక మహిళను చైనాలో నిర్బంధించినప్పుడు, ఆమెకు మద్దతుగా తాను వీడియో చేసినందుకే ఇప్పుడు తనను టార్గెట్ చేశారని అనంత్ అనుమానం వ్యక్తం చేశారు. విచారణ అనంతరం తనను వదిలిపెట్టినప్పటికీ, ఈ ఘటన తనను తీవ్ర మానసిక ఒత్తిడికి గురిచేసిందని ఆయన పేర్కొన్నారు.
ఈ ఘటనపై భారత ప్రభుత్వం తక్షణమే స్పందించి తగిన చర్యలు తీసుకోవాలని అనంత్ మిత్తల్ కోరారు. అరుణాచల్ ప్రదేశ్ విషయంలో చైనా తరచూ కయ్యానికి కాలుదువ్వుతున్న నేపథ్యంలో, ఒక భారతీయ పౌరుడిని ఇలా నిర్బంధించడం ఇరు దేశాల మధ్య నెలకొన్న ఉద్రిక్తతలను మరింత పెంచేలా ఉంది. ఈ విషయంపై భారత విదేశీ వ్యవహారాల శాఖ నుండి ఇంకా అధికారిక ప్రకటన వెలువడాల్సి ఉంది. పర్యాటకులు మరియు వ్లాగర్ల భద్రత దృష్ట్యా ఈ ఉదంతం ఇప్పుడు దేశవ్యాప్తంగా చర్చనీయాంశమైంది.
