బిహార్ ముఖ్యమంత్రి నితీష్ కుమార్కు తన సొంత రాష్ట్రంలోనే ఊహించని పరిణామం ఎదురైంది. ‘సమృద్ధి యాత్ర’లో భాగంగా సివాన్ జిల్లాలో గురువారం జరిగిన బహిరంగ సభలో ఆయన ప్రసంగిస్తుండగా, సభికుల్లోని మహిళలు మధ్యలోనే లేచి వెళ్ళిపోయారు. ప్రభుత్వం చేపడుతున్న సంక్షేమ పథకాలు, ముఖ్యంగా మహిళల కోసం తీసుకువచ్చిన అభివృద్ధి కార్యక్రమాల గురించి ఆయన వివరిస్తున్న సమయంలోనే ఇలా జరగడం విశేషం. మహిళలు తన మాటలను పట్టించుకోకుండా నిష్క్రమించడం చూసి నితీష్ ఒక్కసారిగా సహనం కోల్పోయారు.
సభ నుంచి వెళ్ళిపోతున్న మహిళలను ఉద్దేశించి సీఎం నితీష్ మైకులో గట్టిగా అరుస్తూ.. “ఎందుకు వెళ్ళిపోతున్నారు? నేను చెప్పేది వినకపోతే ప్రభుత్వం మీ కోసం ఏం చేస్తుందో మీకు ఎలా తెలుస్తుంది?” అని ప్రశ్నించారు. అయినా మహిళలు ఆగకుండా వెళ్ళిపోతుండటంతో ఆయన మరింత అసహనానికి గురై, “మీ కోసం మేము ఎన్నో చేశాం.. వచ్చి కూర్చొని ఆలకించండి, లేదంటే బాగుండదు” అంటూ హెచ్చరిస్తున్నట్లుగా మాట్లాడారు. సీఎం స్వరం పెంచి మాట్లాడిన తీరు ఇప్పుడు రాజకీయ వర్గాల్లో చర్చనీయాంశంగా మారింది.
నిజానికి బిహార్లో నితీష్ కుమార్కు మహిళా ఓటర్ల నుంచి గట్టి మద్దతు ఉంది. గత ఎన్నికల్లో ఆయన గెలుపులో మహిళలే కీలక పాత్ర పోషించారు. అయితే, ఇటీవల ఆయన ప్రవర్తనపై తీవ్ర విమర్శలు వ్యక్తమవుతున్నాయి. ముఖ్యంగా కొద్దిరోజుల క్రితం ఉద్యోగ పత్రాల పంపిణీ కార్యక్రమంలో ఒక ముస్లిం డాక్టర్ హిజాబ్ను ఆయన లాగడం దేశవ్యాప్తంగా దుమారం రేపింది. ఈ క్రమంలోనే తాజాగా మహిళలపై ఆయన బహిరంగంగా ఆగ్రహం వ్యక్తం చేయడం ఆయన ప్రజాదరణపై ప్రభావం చూపుతుందేమోనని విశ్లేషకులు భావిస్తున్నారు.
