ఆంధ్రప్రదేశ్ మరియు తెలంగాణ రాష్ట్రాలకు మరో తుపాను ముప్పు పొంచి ఉందని ఇస్రో (ISRO) హెచ్చరించింది. ఈ నెల 19వ తేదీన బంగాళాఖాతంలో మరొక అల్పపీడనం ఏర్పడే అవకాశం ఉందని ఇస్రో అంచనా వేసింది. ఇది క్రమంగా వాయుగుండంగా బలపడి, తుపానుగా మారే అవకాశాలు లేకపోలేదని వాతావరణ శాఖ కూడా ధృవీకరించింది. దీని ప్రభావం వల్ల రెండు తెలుగు రాష్ట్రాలలో మరోసారి భారీ వర్షాలు పడే అవకాశం ఉందని తెలిపింది. ఇటీవల సంభవించిన ‘మొంథా’ తుపాను ప్రభావంతో ఇప్పటికే తెలుగు రాష్ట్రాలు తీవ్రంగా నష్టపోయిన నేపథ్యంలో, ముఖ్యంగా రైతులు, ప్రజలు ఈ కొత్త తుపాను ముప్పు అలెర్ట్‌తో వణికిపోతున్నారు.
ప్రస్తుతం, ఉపరితల ఆవర్తనం సముద్రమట్టానికి 3.1 కిలోమీటర్ల ఎత్తులో విస్తరించి ఉన్న కారణంగా ఆంధ్రప్రదేశ్‌లో ఈరోజు (నవంబర్ 11, 2025) అక్కడక్కడ తేలికపాటి నుంచి మోస్తరు వర్షాలు పడే అవకాశం ఉందని విశాఖ వాతావరణ కేంద్రం హెచ్చరించింది. అయితే, రాష్ట్రంలో ఎక్కువ ప్రాంతాల్లో పొడి వాతావరణం ఉంటుందని అంచనా వేసినప్పటికీ, చలిగాలుల తీవ్రత మాత్రం ఎక్కువగా ఉంటుందని తెలిపింది. ముఖ్యంగా సముద్ర తీర ప్రాంతంలోనూ, ఏజెన్సీ ఏరియాలో చలి తీవ్రత ఎక్కువగా ఉంటుందని, ప్రజలు తగిన జాగ్రత్తలు తీసుకోవాలని సూచించింది.
ఇక తెలంగాణలో కూడా చలిగాలుల తీవ్రత గణనీయంగా పెరిగింది. హైదరాబాద్‌తో పాటు అనేక ప్రాంతాల్లో చలి ఎక్కువగా ఉండటంతో విద్యుత్తు వినియోగం కూడా పడిపోయింది. ఉష్ణోగ్రతలు సాధారణం కంటే రెండు నుంచి మూడు డిగ్రీలు తక్కువగా నమోదయ్యే అవకాశం ఉందని వాతావరణ శాఖ పేర్కొంది. ముఖ్యంగా ఉత్తర తెలంగాణలోని ఆదిలాబాద్, కుమ్రంభీం ఆసిఫాబాద్, మంచిర్యాల, నిర్మల్ వంటి జిల్లాల్లో సింగిల్ డిజిట్ ఉష్ణోగ్రతలు నమోదయ్యే ప్రమాదం ఉందని హెచ్చరించింది. చలి తీవ్రత పెరగడం వల్ల అనారోగ్య సమస్యలు తలెత్తే అవకాశాలు ఉన్నాయని వైద్యులు సూచిస్తున్నారు.
