సంగారెడ్డి జిల్లా ఫసల్వాది ప్రాంతంలో సంక్రాంతి పండుగ పూట తీవ్ర విషాదం చోటుచేసుకుంది. నిషేధిత చైనా మాంజా (నైలాన్ దారం) ఒక నిండు ప్రాణాన్ని బలితీసుకుంది. బైక్పై వెళ్తున్న అద్వైత్ (22) అనే యువకుడి మెడకు గాలిపటం దారం చుట్టుకోవడంతో గొంతు తీవ్రంగా కోసుకుపోయింది. ఈ ప్రమాదంలో భారీగా రక్తస్రావం కావడంతో సదరు యువకుడు అక్కడికక్కడే ప్రాణాలు కోల్పోయాడు.
మృతుడు అద్వైత్ బీహార్ రాష్ట్రానికి చెందిన వ్యక్తిగా గుర్తించారు. ఉపాధి నిమిత్తం సంగారెడ్డికి వలస వచ్చిన అతను, విధి నిర్వహణలో భాగంగా బైక్పై ప్రయాణిస్తుండగా ఈ ప్రమాదం బారిన పడ్డాడు. గాలిపటం దారం మెడకు చుట్టుకున్న వేగంలో గొంతు లోతుగా కోసుకుపోవడంతో ప్రాణాలు రక్షించుకునే అవకాశం కూడా లేకుండా పోయిందని స్థానికులు కంటతడి పెట్టారు. ఈ ఘటన స్థానికంగా పెద్ద ఎత్తున కలకలం రేపింది.
చైనా మాంజా వల్ల జరుగుతున్న ఇటువంటి వరుస ప్రమాదాలు ప్రజలను భయాందోళనకు గురిచేస్తున్నాయి. ఇప్పటికే ప్రభుత్వం ఈ ప్రమాదకరమైన సింథటిక్ దారంపై నిషేధం విధించినప్పటికీ, రహస్యంగా సాగుతున్న విక్రయాలు ఇలాంటి ప్రాణాపాయాలకు కారణమవుతున్నాయి. పండుగ పూట ఇతరుల ప్రాణాలకు ముప్పు కలిగించేలా చైనా మాంజాను వాడొద్దని, అపరాధ రుసుముతో పాటు కఠిన చర్యలు తీసుకుంటామని పోలీసులు హెచ్చరిస్తున్నారు.
