ఆంధ్రప్రదేశ్ ఉప ముఖ్యమంత్రి పవన్ కళ్యాణ్ గిరిజన మహిళలకు నూతన సంవత్సర కానుకగా అరకులో ఒక అత్యాధునిక బ్లడ్ బ్యాంక్ భవనాన్ని నిర్మిస్తామని ప్రకటించారు. గిరిజన ప్రాంతాల్లో గర్భస్రావాలు మరియు తీవ్ర రక్తహీనతకు కారణమవుతున్న సికిల్ సెల్ అనీమియా (Sickle Cell Anemia) వ్యాధిగ్రస్తులకు అండగా నిలిచేందుకు ఈ నిర్ణయం తీసుకున్నారు. అరకు పర్యటనలో ఉన్నప్పుడు ఓ గిరిజన మహిళ తన కష్టాలను పవన్ కళ్యాణ్ దృష్టికి తీసుకురాగా, ఆమెకు ఇచ్చిన హామీని నిలబెట్టుకుంటూ ఈ బ్లడ్ బ్యాంక్ నిర్మాణానికి శ్రీకారం చుట్టారు.
సికిల్ సెల్ అనీమియా అనేది వారసత్వంగా వచ్చే జన్యుపరమైన రుగ్మత. దీనివల్ల రక్తంలోని ఎర్ర రక్త కణాలు కొడవలి ఆకారంలోకి మారి, రక్తప్రసరణకు ఆటంకం కలిగిస్తాయి. దీనికి తరచుగా రక్తమార్పిడి (Blood Transfusion) అవసరం అవుతుంది. ప్రస్తుతం అరకు మరియు పరిసర ప్రాంతాల్లో సరైన బ్లడ్ బ్యాంక్ సౌకర్యం లేకపోవడంతో గర్భిణీలు, బాధితులు తీవ్ర ఇబ్బందులు పడుతున్నారు. పవన్ కళ్యాణ్ చొరవతో, దాతల సహకారంతో అరకు ప్రభుత్వ ఆసుపత్రి ప్రాంగణంలోనే ఈ భవనాన్ని నిర్మించి, అత్యాధునిక సౌకర్యాలతో అందుబాటులోకి తీసుకురానున్నారు
ఈ బ్లడ్ బ్యాంక్ ఏర్పాటు వల్ల అల్లూరి సీతారామరాజు జిల్లాలోని సుమారు 1,500 మంది సికిల్ సెల్ అనీమియా బాధితులకు తక్షణ వైద్య సాయం అందనుంది. పవన్ కళ్యాణ్ కేవలం హామీ ఇవ్వడమే కాకుండా, వైద్య నిపుణులతో చర్చించి ఈ సమస్యకు శాశ్వత పరిష్కారం చూపడం పట్ల గిరిజన లోకం హర్షం వ్యక్తం చేస్తోంది. అడవితల్లి బాట కార్యక్రమంలో భాగంగా ఆయన చేసిన ఈ పర్యటన ఇప్పుడు గిరిజనుల జీవితాల్లో ఒక కొత్త వెలుగును నింపింది.
