RRR తర్వాత లాంగ్ గ్యాప్ తీసుకున్న రాజమౌళి ప్రస్తుతం సూపర్ స్టార్ మహేష్ బాబుతో మూవీ చేయడానికి రెడీ అవుతున్న సంగతి తెలిసిందే. ఈ సినిమా స్క్రిప్ట్ వర్క్ ప్రస్తుతం జరుగుతోంది.
భారీ బడ్జెట్ తో పాన్ వరల్డ్ రేంజ్ లో ఈ చిత్రాన్ని తెరకెక్కించబోతున్నారు. జులై ఆఖరుకి స్క్రిప్ట్ వర్క్ పూర్తవుతుందని ఇప్పటికే రైటర్ విజయేంద్ర ప్రసాద్ క్లారిటీ ఇచ్చారు.
ఈ ఏడాది చివర్లో మూవీ ప్రారంభోత్సవం జరిగే ఛాన్స్ ఉందని ఇండస్ట్రీ వర్గాలలో వినిపిస్తోన్న మాట. ఇదిలా ఉంటే చిత్రంలో వరల్డ్ అడ్వంచర్ ట్రావెలర్ గా సూపర్ స్టార్ మహేష్ బాబు కనిపిస్తాడని, ఇండియానా జోన్స్ తరహాలో సినిమా కథాంశం ఉంటుందని విజయేంద్ర ప్రసాద్ చెప్పారు. అమెజాన్ ఫారెస్ట్ బ్యాక్ డ్రాప్ లోనే ఈ కథ మొత్తం ఉంటుందని జక్కన్న కూడా గతంలో రివీల్ చేశారు.
త్రివిక్రమ్ శ్రీనివాస్ దర్శకత్వంలో ప్రస్తుతం మహేష్ బాబు మూవీ చేస్తున్నారు. ఈ సినిమా కంప్లీట్ అయిన తర్వాత జక్కన్న సినిమాపై ఫోకస్ చేయనున్నారు. ఇప్పటికే SSMB 29 పై సర్వత్రా ఆసక్తి నెలకొని ఉంది. ప్రపంచ వ్యాప్తంగా రాజమౌళి ప్రాజెక్ట్ పై దృష్టి పెట్టింది. ఇదిలా ఉంటే ఈ సినిమాపై కీరవాణి తనయుడు, హీరో శ్రీ సింహ ఇంటరెస్టింగ్ కామెంట్స్ చేశారు.
ఆయన నటించిన భాగ్ సాలే మూవీ రిలీజ్ కి రెడీ అయ్యింది. ఈ మూవీ ప్రమోషన్స్ లో భాగంగా శ్రీ సింహ ఇంటర్వ్యూలో సూపర్ స్టార్ మహేష్ బాబు, జక్కన్న కాంబినేషన్ మూవీ గురించి చెప్పారు. ఈ సినిమా కోసం ఫ్యామిలీ మొత్తం వెయిట్ చేస్తున్నామని అన్నారు. కథ అద్భుతంగా వస్తుందని, ఇంకా స్క్రిప్ట్ దశలోనే అందరూ బిజీగా ఉన్నారని అంటూ.. ఎలా ఉండబోతోందనే ఆసక్తి మాకు కూడా ఉందని అన్నారు.
