హైదరాబాద్: తెలంగాణ పర్యటనకు వచ్చిన కాంగ్రెస్ అగ్రనేత రాహుల్ గాంధీపై విమర్శలు ఎక్కుపెట్టారు బీఆర్ఎస్ ఎమ్మెల్సీ కల్వకుంట్ల కవిత. తెలంగాణ ప్రజలంతా బాగానే ఉన్నారని..
ఇప్పుడున్న మంచి వాతావరణాన్ని మళ్లీ చెడగొట్టవద్దని కాంగ్రెస్ నేతలకు కవిత సూచించారు. బుధవారం నుంచి మూడ్రోజుల పాటు రాహుల్ గాంధీ రాష్ట్రంలో పర్యటించనున్న నేపథ్యంలో కవిత ఆయన పర్యటనపై విమర్శలు గుప్పించారు.
విభజన చట్టంలోని తెలంగాణకు రావాల్సిన వాటాల గురించి రాహుల్ ఎప్పుడైనా ప్రశ్నించారా? అని కవిత నిలదీశారు. అందుకే రాహుల్ జీ మీరు ఇక్కడికి వచ్చి చేసేదేం లేదు.. అంకాపూర్ చికెన్ తినేసి వెళ్లండని వ్యంగ్యాస్త్రాలు సంధించారు కవిత. నిజామాబాద్‌లోని బోధన్ నియోజకవర్గంలో బీఆర్ఎస్ నేతలతో జరిగిన సమావేశంలో ఆమె పాల్గొన్న సందర్భంగా ఈ వ్యాఖ్యలు చేశారు.
నిజామాబాద్ జిల్లాను అన్ని విధాలుగా అభివృద్ధి చేసుకున్నామని కవిత తెలిపారు. కాంగ్రెస్ అగ్రనేతలు వచ్చి తమకు ఏమీ చెప్పనక్కరలేదని స్పష్టం చేశారు. బీసీల అభివృద్ధికి బీఆర్ఎస్ ప్రభుత్వం అనే కార్యక్రమాలు చేపట్టిందని తెలిపారు. రాహుల్ గాంధీ వచ్చి ఇక్కడ చెప్పాల్సింది ఏమీ లేదన్నారు. వేల మంది బీసీ యువకులు విదేశాలకు వెళ్లి చదువుకునే అవకాశం.. సీఎం కేసీఆర్ కల్పించారని కవిత పేర్కొన్నారు.
రైతు బంధు ఇచ్చి రైతులను ఆదుకుంటున్నామని ఎమ్మెల్సీ కవిత తెలిపారు. రైతులపై రాజకీయం చేయడం కాంగ్రెస్ నేతల నైజమని మండిపడ్డారు. బీఆర్ఎస్ పరిపాలనలో హైదరాబాద్‌కు వందల కంపెనీలు వచ్చాయని గుర్తు చేశారు. గత చరిత్రను చూసుకుంటే ఏ రాష్ట్రంలో అయినా సీఎంను మార్చాలని చూపినప్పుడల్లా మత కల్లోలాలు రేపింది ఎవరని కాంగ్రెస్ పార్టీని ఉద్దేశించి ప్రశ్నించారు. కాంగ్రెస్ పాలిత రాష్ట్రాల్లో ఎక్కడైనా ఇంతగా అభివృద్ధి జరిగిందా? అని రాహుల్ గాంధీని కవిత నిలదీశారు. రాహుల్ ఇక్కడ చేసేదేం లేదని.. అంకాపూర్ చికెన్ తినేసి వెళ్లాలని చురకలంటించారు.
