బీహార్ శాసనసభ ఎన్నికలు 2025 రణరంగంలో నామినేషన్ పత్రాల పరిశీలన రాజకీయ పార్టీలను కుదిపేసింది. తొలి దశలోని 121 స్థానాలకు సంబంధించి మొత్తం 467 నామినేషన్లు రద్దు అయ్యాయి. నామినేషన్లు రద్దు కావడానికి ప్రధాన కారణాలు: అభ్యర్థులు అఫిడవిట్‌ను అసంపూర్తిగా దాఖలు చేయడం, తగినంత మంది ప్రపోజర్లు లేకపోవడం, మరియు కొందరి ఓటరు జాబితాలో రెండు చోట్ల ఎంట్రీలు ఉండటం. ఎన్నికల సంఘం (ఈసీ) నిబంధనల ప్రకారమే, పారదర్శకతను నిర్ధారించడానికి లోపాలున్న నామినేషన్లను రద్దు చేసినట్లు పేర్కొంది.
ఈ నామినేషన్ల రద్దు మహాకూటమికి, ఎన్డీఏకు ఇద్దరికీ సవాలుగా మారింది. ముఖ్యంగా మహాకూటమికి ఇది పెద్ద ఎదురుదెబ్బగా పరిగణించవచ్చు. కైమూర్ జిల్లాలోని మోహనియా స్థానం నుంచి ఆర్జేడీ అభ్యర్థి శ్వేతా సుమన్ నామినేషన్‌ను ఈసీ రద్దు చేసింది. శ్వేతా సుమన్ నివాస ధృవీకరణ పత్రం, కుల ధృవీకరణ పత్రంకు సంబంధించిన పూర్తి వివరాలు సమర్పించలేదని తెలుస్తోంది. అదేవిధంగా, సుగౌలీ అసెంబ్లీ నియోజకవర్గం నుంచి మహాకూటమికి చెందిన వీఐపీ అభ్యర్థి శశి భూషణ్ సింగ్ నామినేషన్ కూడా ప్రతిపాదకుల వివరాలు సమర్పించనందున రద్దయింది.
మరోవైపు, మొదటి దశలో సారన్ జిల్లాలోని మఢౌరా అసెంబ్లీ స్థానంలో ఎన్డీఏ కూటమికి చెందిన లోక్ జనశక్తి పార్టీ (రామ్‌విలాస్) అభ్యర్థి, భోజ్‌పురి నటి సీమా సింగ్ నామినేషన్‌ను కూడా సాంకేతిక కారణాల వల్ల రద్దు చేశారు. ఈ కీలక అభ్యర్థుల నామినేషన్ల తిరస్కరణ వల్ల సీట్ల సర్దుబాటుపై ప్రభావం పడే అవకాశం ఉందని రాజకీయ విశ్లేషకులు భావిస్తున్నారు. ఈ పరిణామంపై ఎన్డీఏ దీనిని ‘నియమాల విజయం’గా పేర్కొనగా, మహాకూటమి దీనిని ‘ఒత్తిడి రాజకీయాలు’గా అభివర్ణించింది. తొలి దశ పోలింగ్ నవంబర్ 6న జరగనుంది.
