టెక్ దిగ్గజం ఎలాన్ మస్క్‌కు చెందిన శాటిలైట్ ఆధారిత ఇంటర్నెట్ సేవల సంస్థ స్టార్‌లింక్ భారతదేశంలో తన కార్యకలాపాలు ప్రారంభించే దిశగా కీలక ముందడుగు వేసింది. కేంద్ర టెలికం విభాగం నుంచి ‘లెటర్ ఆఫ్ ఇంటెంట్’ అందుకున్నట్లు విశ్వసనీయ వర్గాలు తెలిపాయి. దీంతో దేశంలో చౌక ధరలకే వేగవంతమైన ఇంటర్నెట్ సేవలు అందుబాటులోకి వచ్చే అవకాశాలు మరింత మెరుగయ్యాయి.
శాటిలైట్ కమ్యూనికేషన్ ఆపరేటర్ల కోసం నిర్దేశించిన నూతన జాతీయ భద్రతా మార్గదర్శకాలకు కట్టుబడి ఉంటామని స్టార్‌లింక్ అంగీకరించడంతో ఈ ప్రాథమిక అనుమతి లభించినట్లు తెలుస్తోంది. తప్పనిసరి ఇంటర్‌సెప్షన్, పర్యవేక్షణ వ్యవస్థలు, స్థానిక డేటా సెంటర్ల వినియోగం, మొబైల్ యూజర్ టెర్మినల్స్ లొకేషన్ ట్రాకింగ్, స్థానికీకరణ ఆదేశాలతో సహా పలు కీలక నిబంధనలను టెలికం శాఖ ఇటీవల ప్రకటించింది.
ప్రస్తుతం స్టార్‌లింక్ ఇండియన్ నేషనల్ స్పేస్ ప్రమోషన్ అండ్ ఆథరైజేషన్ సెంటర్ నుంచి అనుమతి పొందాల్సి ఉంది. ఇందుకు అవసరమైన పత్రాలను ఇప్పటికే సమర్పించినట్లు సమాచారం. ఇన్-స్పేస్ ఆమోదం లభించిన తర్వాత స్పెక్ట్రమ్ కేటాయింపు ప్రక్రియ మొదలవుతుంది.
గత నెలలో కేంద్ర వాణిజ్య, పరిశ్రమల శాఖ మంత్రి పీయూష్ గోయల్, స్టార్‌లింక్ ఉపాధ్యక్షుడు చాడ్ గిబ్స్, సీనియర్ డైరెక్టర్ ర్యాన్ గుడ్‌నైట్‌లతో కూడిన ప్రతినిధి బృందంతో సమావేశమయ్యారు. “స్టార్‌లింక్ అత్యాధునిక సాంకేతిక వేదిక, వారి ప్రస్తుత భాగస్వామ్యాలు, భారతదేశంలో భవిష్యత్ పెట్టుబడి ప్రణాళికలపై చర్చలు జరిగాయి” అని గోయల్ ఈ సమావేశం అనంతరం ‘ఎక్స్’ లో పేర్కొన్నారు.
దేశీయ టెలికాం దిగ్గజాలైన ఎయిర్‌టెల్, వొడాఫోన్ ఐడియా వంటి సంస్థలు కూడా భారతదేశంలో శాటిలైట్ టెలికం సేవల ప్రారంభానికి స్టార్‌లింక్‌తో సంప్రదింపులు జరుపుతున్నట్లు వార్తలు వస్తున్నాయి. ముఖ్యంగా గ్రామీణ ప్రాంతాల్లో శాటిలైట్ ఇంటర్నెట్ అవసరం ఎంతగానో ఉందని కేంద్ర టెలికాం మంత్రి జ్యోతిరాదిత్య సింధియా కూడా గతంలో అభిప్రాయపడ్డారు.
మస్క్‌కు చెందిన స్పేస్‌ఎక్స్ సంస్థ స్టార్‌లింక్‌ను నిర్వహిస్తోంది. ప్రపంచవ్యాప్తంగా వినియోగదారులకు వేగవంతమైన ఇంటర్నెట్ సేవలను అందించడమే స్టార్‌లింక్ లక్ష్యం. ఈ పరిణామాలతో త్వరలోనే భారత వినియోగదారులకు స్టార్‌లింక్ సేవలు అందుబాటులోకి వస్తాయని ఆశించవచ్చు.
