సిరిసిల్ల పర్యటనలో ఉన్న కేటీఆర్, కాళేశ్వరం ప్రాజెక్టు విషయంలో రేవంత్ ప్రభుత్వంపై తీవ్ర విమర్శలు చేశారు. కాంగ్రెస్ నాయకులు అధికారంలోకి రావడం కోసం ఈ ప్రాజెక్టుపై కుట్రలు చేశారని ఆయన ఆరోపించారు. ఇసుక మాఫియా కోసం అడ్డుగా ఉన్న చెక్ డ్యాంలను బాంబులు పెట్టి కూల్చేస్తున్నారని మండిపడ్డారు. మానవ నిర్మిత అద్భుత కట్టడాలపై కాంగ్రెస్ ప్రభుత్వం మానవ విధ్వంసానికి పాల్పడుతోందని ధ్వజమెత్తారు. ప్రజల సొమ్ముతో నిర్మించిన ఆస్తులను నాశనం చేస్తుంటే తాము చూస్తూ ఊరుకోబోమని హెచ్చరించారు.
బీఆర్ఎస్ హయాంలో భూగర్భ జలాలు పెంచేందుకు నిర్మించిన ప్రాజెక్టులను ధ్వంసం చేస్తున్నారని కేటీఆర్ అన్నారు. ఇసుక తరలింపు కోసం ప్రాజెక్టులకు రంధ్రాలు చేస్తూ పొలాలను ఎడారులుగా మారుస్తున్నారని ఆవేదన చెందారు. కాంగ్రెస్ పాలన తీరుపై ‘వాటర్ మ్యాన్ ఆఫ్ ఇండియా’ రాజేంద్ర సింగ్ కూడా ఆగ్రహంగా ఉన్నారని పేర్కొన్నారు. కేసీఆర్ చేసిన మంచి పనులకు వక్రభాష్యం చెబుతూ ప్రాజెక్టులను ప్రభుత్వం దెబ్బతీస్తోందని విమర్శించారు. తెలంగాణ రైతాంగ ప్రయోజనాలను కాంగ్రెస్ మాఫియా రాజకీయాల కోసం బలిపెడుతోందని ఆయన మండిపడ్డారు.
కేటీఆర్ విమర్శలకు కాంగ్రెస్ నేతలు కూడా అదే స్థాయిలో గట్టిగా కౌంటర్ ఇచ్చారు. బాంబులు పెట్టి పేల్చితే కూలిపోయేంత బలహీనంగా కాళేశ్వరం ప్రాజెక్టును నిర్మించారా అని ప్రశ్నించారు. గతంలో మేడిగడ్డ వద్ద చిన్న పగులు మాత్రమే వచ్చిందని చెప్పిన కేటీఆర్, ఇప్పుడు మాట మార్చారని ఎద్దేవా చేశారు. రాజకీయ లబ్ధి కోసం బాంబుల సిద్ధాంతాన్ని తెరపైకి తెచ్చి ప్రజలను తప్పుదోవ పట్టిస్తున్నారని విమర్శించారు. ఏదైనా ఒక మాట మీద నిలబడాలని, గత ప్రభుత్వ తప్పిదాలను కప్పిపుచ్చుకోవడానికే ఇలాంటి ఆరోపణలు చేస్తున్నారని హితవు పలికారు.
